قازاقستاندا تاعى 5 مۇناي باسسەينى زەرتتەلەدى

نۇر- سۇلتان. قازاقپارات - ەنەرگەتيكا ۆيتسە- ءمينيسترى اسەت ماعاۋوۆ ەلىمىزدە گەولوگيالىق بارلاۋ مەملەكەتتىك باعدارلاماسى ازىرلەنىپ جاتقانىن ءمالىم ەتتى، دەپ حابارلايدى قازاقپارات ءتىلشىسى.

«گەولوگيالىق بارلاۋ سەكتورىنىڭ ينۆەستيتسيالىق تارتىمدىلىعىن جاقسارتۋ بويىنشا جۇرگىزىلىپ جاتقان جۇمىستى اتاپ وتكەن ءجون. جەر قويناۋىن پايدالانۋ سالاسىن رەتتەۋدى جەڭىلدەتۋ ءۇشىن تۇزەتۋلەر توپتاماسى ازىرلەندى. جەر قويناۋىن پايدالانۋ قۇقىعىن بەرۋ بويىنشا ەلەكتروندىق اۋكتسيون تەتىگى ازىرلەندى. تەڭىزدەگى گەولوگيالىق بارلاۋعا باسىمدىق بەرۋدىڭ ارقاسىندا 2018 -جىلدان باستاپ ءبىرقاتار جوبا ىسكە اسىرىلدى. اتاپ ايتقاندا، «قازمۇنايگاز» جانە ارىپتەس ENI - يساتاي، اباي كەنىشتەرىن، «قازمۇنايگاز» بەن «لۋكويل» كومپانياسى جەڭىس بلوگىن دامىتا باستادى»، - دەدى اسەت ماعاۋوۆ وكق- دا وتكەن باسپا ءسوز ءماسليحاتىندا.

ۆيتسە- ءمينيستردىڭ ايتۋىنشا، تەڭىز جوبالارىمەن بىرگە قازاقستاننىڭ از زەرتتەلگەن اۋماقتارىندا گەولوگيالىق بارلاۋدى جانداندىرۋ جوسپارلانىپ وتىر.

«ەكولوگيا، گەولوگيا جانە تابيعي رەسۋرستار مينيسترلىگىمەن بىرلەسىپ، 2021-2025 -جىلدارعا ارنالعان گەولوگيالىق بارلاۋ مەملەكەتتىك باعدارلاماسى ازىرلەنۋ ۇستىندە. باعدارلاما ءساتىن سالسا 2020 -جىلى قابىلدانادى. ارال، سىرداريا، ەرتىس بويى، شۋ- سارىسۋ، سولتۇستىك تورعاي سياقتى 5 كەلەشەگى مول باسسەيندى زەردەلەۋ ءۇشىن مەملەكەتتىك ينۆەستيتسيا سالۋ كوزدەلەدى. زەرتتەۋ دارەجەسىن ارتتىرۋ بۇدان ءارى جەر قويناۋىن پايدالانۋعا جەكە ينۆەستيتسيا تارتۋعا مۇمكىندىك بەرەدى»، - دەدى ول.