دارىگەردىڭ جالاقىسى الداعى 5 جىلدا ەكى جارىم ەسەگە ارتادى - ەلجان ءبىرتانوۆ
«باعدارلامانىڭ ماقساتى - ساپالى جانە قولجەتىمدى دەنساۋلىق ساقتاۋدى قامتاماسىز ەتۋ. وسى ماقسات ءۇش مىندەت ارقىلى توعىز جۇمىس باعىتى اياسىندا ورىندالادى. العاشقى مىندەت - قوعامدىق دەنساۋلىق ساقتاۋدى دامىتۋ. وسى ورايدا، تۇزدى تۇتىنۋ 31 پايىزعا، تەمەكى شەگۋ 13,6 پايىزعا، الكوگولدى تۇتىنۋ 16 پايىزعا تومەندەيدى. دەنە شىنىقتىرۋ جانە سپورتپەن اينالىساتىن حالىق ۇلەسى 36 پايىزعا جەتەدى. ەكىنشى باعىت اياسىندا تاماق ونىمدەرىنىڭ ساپاسىنا، نەگىزگى ينفەكتسيالىق اۋرۋلارمەن كۇرەسكە جانە جاراقاتتانۋ مەن جازاتايىم وقيعالاردى تومەندەتۋگە نازار اۋدارىلادى»، - دەدى باعدارلاما جوباسىن تانىستىرعان ق ر دەنساۋلىق ساقتاۋ ءمينيسترى ەلجان ءبىرتانوۆ.
ونىڭ ايتۋىنشا، ناتيجەسىندە ادامنىڭ يممۋن تاپشىلىعى ۆيرۋسىنەن ەمدەۋمەن قامتۋ 29 پايىزعا ارتادى، جول-كولىك وقيعاسىنان ءولىم 24 پايىزعا، تۋبەركۋلەزبەن سىرقاتتانۋ 9 پايىزعا، ۋلانۋدان ءولىم 10 پايىزعا تومەندەيدى. ءۇشىنشى باعىت اياسىندا اۋرۋلاردىڭ الدىن الۋعا، جاستار دەنساۋلىق ورتالىقتارىن كۇشەيتۋ ارقىلى بالالار مەن جاستار دەنساۋلىعىنا، ونىڭ ىشىندە مەنتالدى جانە رەپرودۋكتيۆتى دەنساۋلىققا ەرەكشە كوڭىل بولىنەدى. وسى شارالاردىڭ ارقاسىندا العاشقى مەديتسينالىق- سانيتاريالىق ۇيىمدارعا پروفيلاكتيكا ماقساتىمەن كەلۋ جيىلىگى 16 پايىزعا ارتادى.
«كەلەسى باعىت - ادامي كاپيتالدى دامىتۋ. مۇندا كاسىبي دامىتۋدى جەتىلدىرۋ، بيومەديتسينالىق زەرتتەۋلەر نارىعىن دامىتىپ، كوممەرتسيالاندىرۋ، دەربەستەندىرىلگەن مەديتسينانى ەنگىزۋ كوزدەلگەن. جالاقىنى ارتتىرۋ، الەۋمەتتىك قولداۋدى كۇشەيتۋ، كاسىبي جاۋاپكەرشىلىكتى قورعاۋ ارقىلى مەديتسينالىق قىزمەتكەر مارتەبەسىن ارتتىرۋ جوسپارلانعان. دارىگەردىڭ ورتاشا جالاقىسى 2025 -جىلى 2,5 ەسەگە وسەدى جانە اۋىلداعى مەديتسينالىق قىزمەتكەرلەرمەن قامتاماسىز ەتۋ 13 پايىزعا ارتادى، كلينيكالىق زەرتتەۋلەر سانى 2 ەسە كوبەيەدى»، - دەدى ول.
ءمينيستردىڭ اتاپ وتىنشە، بەسىنشى باعىت اياسىندا پەدياتريا، وڭالتۋ جانە باسقا مەديتسينالىق قىزمەتتەردى كەڭەيتۋ جانە ءدارى- دارمەكپەن قامتاماسىز ەتۋدى جەتىلدىرىلەدى. پاتسيەنتتەردىڭ مەديتسينالىق كومەك ساپاسىنا قاناعاتتانۋ 65 پايىزعا دەيىن ارتادى، مۇگەدەكتىككە العاشقى شىعۋ دەڭگەيى 2,4 پايىزعا تومەندەيدى. ال التىنشى باعىت اقپاراتتىق جۇيەلەردى ودان ءارى دامىتۋدى، بيزنەس ينتەللەكت قۇرالدارىن ەنگىزۋدى، قاشىقتىق مەديتسيناسىن دامىتۋدى، ستاتيستيكانىڭ جاڭا تاسىلدەرىن ەنگىزۋدى كوزدەيدى. وسىلايشا، ينتەروپەرابەلدىك پلاتفورماسىمەن تولىق ينتەگراتسيالانعان مەديتسينالىق ۇيىمدار ۇلەسى 90 پايىزعا جەتەدى.
«دەنساۋلىق ساقتاۋ جۇيەسىنىڭ تۇراقتى دامۋى» دەگەن ءۇشىنشى مىندەت اياسىندا حالىقتىڭ دەنساۋلىققا جەكە شىعىندارى 39 پايىزدان 27 پايىزعا تومەندەيدى. ەلباسىنىڭ تاپسىرماسىن ورىنداۋ بارىسىندا، العاشقى مەديتسينالىق- سانيتاريالىق كومەك پەن قوعامدىق دەنساۋلىق ساقتاۋدى قارجىلاندىرۋ جالپى شىعىستاردىڭ 60 پايىزىنا جەتەدى. سەگىزىنشى باعىت اياسىندا قۇرال- جابدىقتاردى جاڭارتۋعا، ءىرى وبەكتىلەردى سالۋعا ينۆەستيتسيالىق شىعىنداردى وتەۋ، تاريفتەردى جەتىلدىرۋ كوزدەلگەن. پرەزيدەنت تاپسىرماسى بويىنشا، مەديتسينالىق تەحنيكامەن جابدىقتاۋ 100 پايىزعا جەتەدى، مەديتسينالىق عيماراتتارىنىڭ توزۋى 32 پايىزعا تومەندەيدى، دەنساۋلىق سالاسىنا ينۆەستيتسيالار كولەمى التى جىلدا 2,8 تريلليون تەڭگەگە ارتادى. ونىڭ ىشىندە جەكە ينۆەستيتسيالار ۇلەسى 70 پايىزدان اسادى»، - دەدى ول.
ونىڭ دەرەگىنشە، 2025 -جىلعا دەيىن حالىقارالىق ستاندارتتارعا ساي 19 زاماناۋي كوپسالالى اۋرۋحانا سالىنادى جانە بۇعان 1 تريلليون تەڭگەدەن استام ينۆەستيتسيا تارتۋ جوسپارلانعان. بۇل ءىرى حالىقارالىق جەكە ينۆەستورلار ارقىلى ورىندالادى. وسىلايشا، ماڭىزدى اۋرۋحانا توسەك ورىندارى 50 پايىزعا جاڭارادى. بۇل ماقساتتا وسى جىلدىڭ 11-جەلتوقسانىندا قازاقستان رەسپۋبليكاسىنىڭ ۇكىمەتى مەن ەۋروپا قايتا قۇرۋ جانە دامۋ بانكى اراسىنداعى نيەت تۋرالى مەموراندۋمعا قول قويىلدى.
«توعىزىنشى باعىتقا مەنەدجەرلەردى دايىنداۋ جانە جوبالىق باسقارۋدى ودان ءارى ەنگىزۋ ەندى. اشىقتىقتى قامتاماسىز ەتۋ ءۇشىن، وڭىرلەردىڭ قاتىسۋىمەن دەنساۋلىق ساقتاۋدىڭ بارلىق دەڭگەيىندە جوبالىق جۇمىس پەن كورپوراتيۆتۋ باسقارۋ كوزدەلگەن. ناتيجەسىندە، اككرەديتتەلگەن مەديتسينالىق ۇيىمدار ۇلەسى 70 پايىزعا، مەنەدجمەنت بويىنشا جوعارى كورسەتكىشتەرى بار مەديتسينالىق ۇيىمدار ۇلەسى 45 پايىزعا جەتەدى» - ەلجان ءبىرتانوۆ.
اۆتور: مارلان جيەمباي
