ىشكى ىستەر ءمينيسترى قاسىموۆ 5 بالانىڭ ءومىرىن جالماعان ءورتتىڭ شىعۋ سەبەبىن ايتتى
بۇل تۋرالى بۇگىن ۇكىمەتتىڭ سەلەكتورلىق رەجىمدەگى وتىرىسىندا ق ر ىشكى ىستەر ءمينيسترى قالمۇحانبەت قاسىموۆ ايتتى، دەپ حابارلايدى قازاقپارات ءتىلشىسى.
«11 ايلىقتان 12 جاسقا دەيىن 5 بالا قازا تاپتى. ءورتتىڭ سەبەبىنە كەلەر بولساق، پەش جاققاندا قاۋىپسىزدىك شاراسى ساقتالماعان. ءورت سودان شىعىپ وتىر. سودان كەيىن بالالار تۇنگى ۋاقىتتا قاراۋسىز قالعان. ءورت سوندىرۋشىلەر 7 مينۋتتا جەتكەن. پوليتسيا مەن جەدەل جاردەم دە وسى ۋاقىتتا بولعان. ءبىراق، وكىنىشكە وراي جاعدايدىڭ الدىن الۋعا مۇمكىندىك بولمادى»، - دەدى ق. قاسىموۆ.
ونىڭ ايتۋىنشا، ەلىمىزدە قازىرگى ۋاقىتتا مۇنداي جاعدايلار از ەمەس. دەگەنمەن، جىلۋ بەرۋ ماۋسىمى وتكەن جىلدىڭ 15- قازانىندا باستالعاننان بەرى ءورت ءبىرشاما ازايدى.
«ەڭ باستىسى قازا تاپقانداردىڭ سانى ازايدى. ءبىراق، ۋلانۋدان قازا بولعاندار سانى 12 پايىزعا ارتىپ وتىر. جىل سايىن ءبىزدىڭ ورتكە قارسى قىزمەت الدىن الۋ شارالارىن جۇرگىزەدى. سوڭعى بىرنەشە ايدا 1,7 ميلليون جەكە ءۇيدى ارالادى. 4 ميلليون اداممەن كەزدەسىپ، ءتۇسىندىرۋ جۇمىستارىن جۇرگىزدى. وسى جاعدايعا بايلانىستى تاعى جۇمىستى جانداندىرامىز»، - دەدى مينيستر.
بۇگىنگى ۇكىمەتتىڭ سەلەكتورلىق رەجىمدەگى وتىرىسىندا ق ر پرەمەر-ءمينيسترى باقىتجان ساعىنتايەۆ ورتتەن قازا تاپقان 5 بالانىڭ اتا-اناسىنا كوڭىل ايتتى.
ەسكە سالا كەتەيىك، 4- اقپان كۇنى تۇندە ەلوردانىڭ سارىارقا اۋدانىنداعى «كوكتال-1» تۇرعىن ءۇي الابىندا جەكە ءۇيدىڭ اۋلاسىندا تۇرعىزىلعان ۋاقىتشا باسپانادا ءورت شىقتى. ءورتتى ءسوندىرۋ بارىسىندا 2006، 2008، 2014، 2016، 2018-جىلعى 5 قىز بالانىڭ دەنەسى تابىلدى.
ولاردىڭ كىشىسى نەبارى ءۇش ايلىق ءسابي ەدى. ءورت كەزىندە بەس بالانىڭ اتا-اناسى تۇنگى جۇمىستا بولعان.