سەكسەۋىلدى كەسۋگە موراتوري 5 جىلعا ۇزارتىلدى

بۇعان دەيىن مۇنداي شەكتەۋ ەلىمىزدىڭ ورمان شارۋاشىلىعى جانە جانۋارلار دۇنيەسى كوميتەتىنىڭ بۇيرىعى نەگىزىندە 2015 -جىلدان 2018 -جىلدىڭ 31 - جەلتوقسانىنا دەيىن ەنگىزىلگەن بولاتىن.

 اتاپ وتىلگەندەي، تابيعاتتى قورعاۋعا باعىتتالعان وسىنداي شارالار نەگىزىندە قازاقستاندا سەكسەۋىل پلانتاتسيالارىنىڭ كولەمىن ارتتىرۋ مۇمكىن بولدى.

بۇگىندە سىر وڭىرىندەگى ورماندى جەرلەردىڭ 87 پايىزىندا شولگە شىدامدى اعاشتىڭ وسى ءتۇرى وسەدى. ايتا كەتەيىك، «ورمانداردى ساقتاۋ جانە رەسپۋبليكانىڭ ورماندى جەرلەرىن كوبەيتۋ» جوباسى اياسىندا 2008-2014 -جىلدار ارالىعىندا ارال تەڭىزىنىڭ قۇرعاعان ۇلتانىنا 57 مىڭ گەكتاردان استام سەكسەۋىل، سارسازان ءتارىزدى، شولگە، سورتاڭ توپىراققا بەيىمدى اعاش- بۇتا تۇرلەرى وتىرعىزىلدى. بيىل تاعى 10 مىڭ گەكتار تەڭىز ۇلتانىنا سەكسەۋىل ەگىلمەك.

«2018 -جىلى وسى كۇنگە دەيىن سەكسەۋىل پلانتاتسيالارىن زاڭسىز كەسۋدىڭ 49 دەرەگى تىركەلدى. 10 ازاماتقا ايىپپۇلدار سالىندى، ءۇش ادام 200 ساعاتتىق قوعامدىق جۇمىسقا تارتىلدى. تاعى ەكى ادام ءبىر جىلعا دەيىن باس بوستاندىعىنان ايىرىلدى. 25 سوتتالۋشى تابيعاتقا كەلتىرگەن شىعىندى وتەگەننەن كەيىن سوت شەشىمىمەن قىلمىستىق جاۋاپكەرشىلىكتەن بوساتىلدى» ، - دەدى وبلىستىق ورمان شارۋاشىلىعى جانە جانۋارلار دۇنيەسى اۋماقتىق ينسپەكسياسىنىڭ باس مامانى ايبەك جولاقانوۆ.