قازاقستاندا سوڭعى بەس جىلدا ەڭبەك داۋى 5 ەسەگە ازايعان

استانا. قازاقپارات - قازاقستاندا ەڭبەك داۋى سوڭعى 5 جىل ىشىندە 5 ەسەگە ازايعان. بۇل تۋرالى ق ر ەڭبەك جانە حالىقتى الەۋمەتتىك قورعاۋ مينيسترلىگى ەڭبەك زاڭناماسىن باقىلاۋ باسقارماسىنىڭ باسشىسى باعلان جالپوشوۆ ءمالىم ەتتى، دەپ حابارلايدى قازاقپارات ءتىلشىسى.

«ەڭبەك داۋى الەۋمەتتىك-ەكونوميكالىق جاعدايدان بولەك، جالپى ەلدىڭ دامۋىنا دا اسەر ەتەدى. ەڭبەك جانجالدارى ىشكى جانە سىرتقى بولىپ بولىنەدى، سونىڭ ىشىندە سىرتقى جانجال ەلدىڭ جالپى يميدجىنە نۇقسان كەلتىرەدى. ءبىراق، بىزدە قابىلدانعان كەشەندى زاڭدار جانە جۇرگىزىلگەن ءتيىستى شارالار مەن باقىلاۋلاردىڭ ناتيجەسىندە، ەڭبەك داۋى سوڭعى 5 جىلدا، 5 ەسەگە ازايدى»، - دەدى باعلان جالپوشوۆ.

ونىڭ ايتۋىنشا، تالداۋ ناتيجەسى كورسەتكەندەي جۇمىس بەرۋشىلەر مەن جۇمىسشىلاردىڭ اراسىندا ءتيىمدى الەۋمەتتىك ديالوگ جۇرگىزىلمەيدى. سونداي-اق، ەڭبەك داۋلارىنىڭ %30 ەڭبەكاقىنىڭ ۋاقىتىلى تولەنبەۋىنەن تۋىندايدى.

«بۇگىنگى تاڭدا مينيسترلىك مەدياتسيا قىزمەتىن دامىتۋ مەن ەڭبەكتەگى داۋ-جانجالداردىڭ الدىن الۋ ماقساتىندا ءبىرقاتار شارالاردى قولعا الدى. اتاپ ايتقاندا، ەلىمىزدە جەرگىلىكتى اتقارۋشى ورگاندار، كاسىپوداق جانە جۇمىس بەرۋشىلەر بىرلەستىكتەرى اياسىندا كەلىستىرۋشىلەر پۋلىن قۇرۋدامىز. ودان بولەك، «اتامەكەن» ۇ ك پ- دا كاسىپكەرلەرگە قولداۋ بىلدىرەتىن «ەڭبەك ومبۋدسمەنى» ينستيتۋتى قۇرىلدى. جانە دە «سامۇرىق-قازىنا» ا ق- نىڭ الەۋمەتتىك تۇراقتىلىق يندەكسىن قۇرۋ بويىنشا تاجىريبەسىن ۇيرەنۋدى قولعا الۋدامىز»، - دەدى ول.

ايتا كەتسەك، بۇگىندە ەلىمىزدىڭ بارلىق وڭىرىندەگى جەرگىلىكتى اتقارۋ ورگاندارى اياسىندا ەڭبەك ينسپەكتسياسى بويىنشا مونيتورينگ جۇرگىزۋ توبى جۇمىس ىستەيدى. ونداعى الەۋمەتتىك توپ وكىلدەرى، زاڭگەرلەر مەن مەدياتورلار ەڭبەك جانە باسقا دا داۋ-دامايدى سوتقا جەتكىزبەي شەشۋمەن اينالىسادى.

بۇعان دەيىن حابارلاعىنىمىزداي، بۇگىن استانادا قازاقستاندا مەدياتسيانى دامىتۋ ماسەلەسى قارالىپ، ەڭبەك قۇقىعى، ەڭبەك قاتىناستارىنداعى كاسىپوداقتاردىڭ ءرولى، ەڭبەك داۋلارىن شەشۋ كەزىندە مەدياتسيا شارالارىن قولدانۋ جانە كاسىپوداقتارداعى شەتەلدىك مەدياتسيا تاجىريبەلەرىن زەرتتەۋ ماسەلەلەرى كەڭىنەن تالقىلاندى.