ماڭعىستاۋ وبلىسىندا جان-جانۋاردىڭ قۇتىرۋى بويىنشا 5 فاكتى راستالعان
ونىڭ ەكەۋى - جارمىش اۋىلىندا، ۇشەۋى - قاراقيا اۋدانىندا. بۇل تۋرالى 16 -اقپان كۇنى وڭىرلىك كوممۋنيكاتسيالار قىزمەتىندە وتكەن باسپا ءسوز ءماسليحاتىندا وبلىس اكىمىنىڭ ورىنباسارى بەكمۇرات ءجۇسىپوۆ مالىمدەدى.
قازىر ۆەتەرينارلىق باقىلاۋ جانە قاداعالاۋ كوميتەتىنىڭ ماماندارى جارمىشتا تەكسەرۋ جۇرگىزىپ، ۆاكتسيناتسيالاۋمەن اينالىسۋدا. ماماندار وسى ۋاقىتقا دەيىن 27 سىنامانى استاناعا جىبەرگەن.
«جارمىش اۋىلىندا 2 تۇيە، قاراقيا اۋدانىندا 1 تۇيە، 1 جىلقى جانە 1 جابايى قاسقىردىڭ قۇتىرۋ اۋرۋىمەن اۋىرعانى انىقتالدى. بۇل ولگەن جان- جانۋارلاردى زەرتحاناعا تاپسىرۋدىڭ قورىتىندىسى بويىنشا بەلگىلى بولىپ وتىر»، - دەيدى بەكمۇرات ءجۇسىپوۆ.
قازىر جارمىشتاعى ەكى شارۋا قوجالىعى مەن قاراقيا اۋدانىنىڭ بوستان، قۇراندى جانە قۇرىق اۋىلدارىنىڭ كەيبىر ەلدى مەكەندەرىندە شەكتەۋ قويىلعان.
«شەكتەۋ قويىلدى دەگەنىمىز - كارانتين ەمەس. كارانتين - بۇل بۇكىل ءبىر تەرريتوريانى جابۋ، ول تەرريتورياعا كىرىپ- شىعۋعا تىيىم سالۋ. شەكتەۋ كەزىندە ونداي تىيىمدار قويىلمايدى. سوندىقتان، ءبىزدىڭ وبلىستا - كارانتين جوق. تەك اۋرۋ تابىلعان كەيبىر قورالارعا، اۋىلدارعا عانا شەكتەۋ قويىلدى»، - دەپ اتاپ ءوتتى وبلىس اكىمىنىڭ ورىنباسارى.
اتاپ وتىلگەندەي، قۇتىرۋ اۋرۋى شىققان شارۋا قوجالىقتارىندا مالدارمەن قوسا ادامدارعا دا ەكپە جاسالۋدا.
«رەسپۋبليكالىق ەپيزووتياعا قارسى جاساقتىڭ» ماماندارىنا قۇتىرۋ اۋرۋىنا قارسى ءدارى كەلدى. 19 باس ءمۇيىزدى قارا، 814 باس ءمۇيىزدى ۇساق مالعا، 78 باس تۇيەگە، 19 باس جىلقى مالىنا جانە 3 يتكە قۇتىرۋعا قارسى ۆاكسينا ەگىلىپ جاتىر. دارىلەر استانادان كەلدى»، - دەدى ق ر اشم ۆەتەرينارلىق باقىلاۋ جانە قاداعالاۋ كوميتەتىنىڭ ماڭعىستاۋ وبلىسى بويىنشا باس مەملەكەتتىك ۆەتەرينارلىق- سانيتارلىق ينسپەكتورى قۋانىشكەرەي مىرزاتايەۆ.
ەسكە سالايىق، ەلىمىزدىڭ ءبىرقاتار بۇقارالىق اقپارات قۇرالدارى ماڭعىستاۋدىڭ جارمىش اۋىلىندا تۇيەلەر جاپپاي قىرىلىپ جاتقانى تۋرالى حابارلاعان بولاتىن.
بۇل اقپاراتتى كەيىن ماڭعىستاۋ وبلىستىق ۆەتەريناريا باسقارماسىنىڭ باسشىسى شامعالي حامييەۆ تەرىسكە شىعاردى.
«جارمىش وكرۋگىندە 40 تۇيە ءولدى دەگەن قاۋەسەت شىققان. ونداي مالىمەت رەسمي تىركەلگەن جوق. جالعىز جارمىش ەمەس، اۋدانداعى بۇكىل اۋىلدار بويىنشا ەكى ايدىڭ ىشىندە 10 تۇيەنىڭ عانا ماتەريالى تاپسىرىلعان. ەكى تۇيەدەن عانا قۇتىرۋدىڭ قوزدىرعىشى انىقتالدى. قۇتىرۋ اۋرۋى قورىتىندىسى بەرىلگەن ەكى شارۋاشىلىققا شەكتەۋ شارالارى ەنگىزىلدى. قۇتىرۋ - كارانتين جاريالاناتىن اۋرۋدىڭ تۇرىنە كىرمەيدى، تەك شەكتەۋ شارالارى ەنگىزىلەدى»، - دەدى شامعالي حاميەۆ.
