شىنجاڭدا قۇربان ايت مەرەكەسىنە وراي 5 كۇن اقىلى جولدار تەگىن بولادى - شەتەلدەگى قازاق ءتىلدى ب ا ق- قا شولۋ
شىنجاڭدا قۇربان ايت مەرەكەسىنە وراي 5 كۇن اقىلى جولدار تەگىن بولادى - «جەنمين جيباو» (People Daily) 
ق ح ر شىنجاڭ ولكەسىندە قۇربان ايت مەرەكەسىنە وراي 5 كۇن دەمالىس بەرىلدى. وسى مەرەكە كۇندەرى شىنجاڭداعى اقىلى جولدار جەڭىل كولىكتەر ءۇشىن تەگىن بولماق، دەپ حابارلايدى قىتايلىق kazakh.people.com سايتى.
«شىڭجاڭ ولكەسىنىڭ اۆتوجول باسقارماسى قۇربان ايت مەرەكەسىندە 5 كۇن اقىلى جولداردا جەڭىل كولىكتەر ءۇشىن تەگىن جۇرۋگە رۇقسات بەردى. بۇل جەڭىلدىك حالىققا مەرەكەلىك جاقسى كوڭىل- كۇي سىيلاۋ ءۇشىن جاسالىپ وتىر. سونداي- اق، مەرەكە كەزىندە شىنجاڭداعى اۆتوجولداردا كولىك اعىنىنىڭ ارتۋى ورىن الادى. اقىلى جولداردىڭ اشىق بولۋى كولىك كەپتەلىسىن ازايتادى»، - دەپ حابارلايدى اتالعان سايت.
ماگاتە قازاقستاندا ۋران ساقتايتىن بانك اشتى - «فارس» اقپارات اگەنتتىگى
«تومەن دارەجەدە بايىتىلعان ۋران ساقتايتىن بانكى قازاقستاننىڭ وسكەمەن قالاسىندا اشىلدى. بۇل بانكتىڭ ساقتاۋ سىيىمدىلىعى جالپى 90 توننا يادرولىق وتىن دەپ جاريالاندى. قازاقستاندا يادرولىق وتىن ساقتاۋ بانكىن اشۋداعى ماقسات وسى ۋاقىتقا دەيىن يادرولىق ونەركاسىپكە يە بولماعان ەلدەردە ۋران بايىتۋ جۇمىستارىنىڭ باستالۋىنىڭ الدىن الۋ دەپ جاريالاندى»، - دەپ جازادى parstoday اقپارات اگەنتتىگى.
وسىعان قاتىستى ماگاتە- ءنىڭ باس ديرەكتورى يۋكيو امانو مالىمدەمە جاريالاپ: «ۋران بانكى ءالسىز بايىتىلعان ۋراندى يادرولىق وتىن ءوندىرۋ ءۇشىن اتوم ستانسالارىندا قولدانعىسى كەلەتىن ەلدەردى سەندىرۋدىڭ سوڭعى مەحانيزمى بولىپ وتىر»، - دەدى.
«الەمدىك الپاۋىتتار تاراپىنان قالىپتاسقان شەكتەۋلەرگە بايلانىستى قازاقستاندا ءالسىز بايىتىلعان ۋران ساقتاۋ بانكىن اشۋ بىرنەشە قىردان ماڭىزدى: بىرىنشىدەن، بۇل - تولىعىمەن ويلاستىرىلعان قادام. سونىڭ ناتيجەسىندە اتوم قۋاتىنا يە ەلدەر بولاشاقتا باسقا ەلدەردىڭ ۋران بايىتۋعا، اسىرەسە اتوم ونەركاسىبىنە يە بولۋعا ۇمتىلۋىنا كەدەرگى جاسايدى؛ ەكىنشىدەن، بۇرىن اتوم قۋاتىنا يە بولعان قازاقستان ايماق ەلدەرىنىڭ، اسىرەسە كەڭەس وداعىنان قالعان ەلدەردىڭ ۋران بايىتۋعا ۇمتىلۋىنا توسقاۋىل بولادى؛ ۇشىنشىدەن، ءالسىز بايىتىلعان ۋران ساقتاۋ بانكىن اشۋ ماگاتە- ءنى باقىلاۋشى ۇيىمنان يادرولىق ونىمدەرمەن قامتاماسىز ەتەتىن نەگىزگى ۇيىمعا اينالدىرادى. شىن مانىندە، ۋران بايىتۋ بولاشاقتا ءبىر ەلدە نەمەسە تەك بىرنەشە ەلدە عانا شوعىرلاناتىن بولادى. ماگاتە- ءنىڭ الەمنىڭ باسقا ايماقتارىندا دا وسىنداي بانكتەر اشۋدى كۇن تارتىبىنە قويىپ وتىرعانى انىق»، - دەپ جازادى يراندىق ب ا ق.
ماماندار قازاق جىلقىسىنىڭ وزگە تۇقىممەن بۋدانداسپاعانىن ايتتى - قىتايدىڭ «ورتالىق حالىق راديوسى» (CNK)
قىتايدىڭ مال شارۋاشىلىعى قوعامى مەن شىنجاڭ ولكەلىك مال شارۋاشىلىعى باسقارماسىنىڭ ماماندارى التاي ايماعىنىڭ كوكتوعاي اۋدانىنا ارنايى كەلىپ، التاي (قازاق) جىلقىسىنا زەرتتەۋ جاسادى، دەپ حابارلايدى kazakcnr.com سايتى.
«ماماندار توبى كوكتوعاي اۋدانىنىڭ اقسالا جايلاۋىنا بارىپ، التاي جىلقىسى ءۇيىرىن كورىپ، جىلقى تۇقىمىنا ساراپتاما جاساپ، تۇقىم سۇرىپتاۋ، جىلقى تۇقىمىن جاقسارتۋ باعىتىندا جۇمىستار جاسادى. التاي جىلقىسىنىڭ ءسۇت، ەت بەرۋ ەرەكشەلىگىن، تۇلعاسىن، ساپالىق دەڭگەيىن باعالاپ، جان- جاقتى عىلىمي- زەرتتەۋ جۇرگىزدى»، - دەپ جازادى اتالعان دەرەككوز.
قىتاي اگرارلىق ۋنيۆەرسيتەتى جانىنداعى حايۋاناتتار عىلىمى ينستيتۋتىنىڭ پروفەسسورى حان گوساي تەكسەرۋ قورتىندىسىنان كەيىن قازاق جىلقىسىنىڭ تازا قاندى، ءوز تۇقىمىن ساپالى ساقتاپ قالعانىن العا تارتتى.
«ءبىز زەرتتەپ، تالداۋ ارقىلى كوكتوعاي اۋدانىندا قازاق جىلقىسى ءۇيىرىنىڭ مول، سانىنىڭ كوپ ەكەندىگىن بايقادىق، قازاق جىلقىسى وزگە تۇقىممەن بۋدانداسپاعان، ساپاسى جاقسى، عىلىمي زەرتتەۋگە تاتيدى. زەرتتەۋ بارىسىندا كوپتەگەن قۇندى دەرەكتەرگە يە بولدىق»، - دەيدى پروفەسسور.
اشحابادتاعى جىلقىنىڭ باس ءمۇسىنى گيننەسس رەكوردتار كىتابىنا ەندى - ت ر ت
اشحابات وليمپيادا كومپلەكسى اياسىندا سالىنعان جىلقىنىڭ باس ءمۇسىنى مەن جابىق سۋ سپورتتارى ورتالىعى گيننەسس رەكوردتار كىتابىنا ەندى، - دەپ حابارلايدى تۇركيا راديو تەلەديدار اگەنتتىگى.
اتالعان اقپارات كوزىنىڭ جازۋىنشا، 17-27 - قىركۇيەك كۇندەرى اراسىندا بولىپ وتەتىن 5- ازيا ويىندارى اياسىندا تۇرىك فيرماسى سالعان اشحاباد وليمپيادا كومپلەكسى ىشىندەگى وليمپيادا ستاديونىن بەينەلەگەن جىلقىنىڭ باس ءمۇسىنى مەن جابىق سۋ سپورتتارى ورتالىعى گيننەسس رەكوردتار كىتابىنا ەندى. اشحاباد وليمپيادا ستاديونىن بەينەلەگەن جىلقىنىڭ باس ءمۇسىنىنىڭ بيىكتىگى 40,05 مەتر، ەنى 37,69 مەتر بولىپ، الەمنىڭ ەڭ ۇلكەن جىلقى ءمۇسىنى رەتىندە گيننەسس ۇيىمى تاراپىنان تىركەلگەنى اتاپ كورسەتىلدى. اشىلۋ راسىمىندە جىلقىنىڭ باس ءمۇسىنىنىڭ ۇلكەندىگىنە قوسا، كوركەمونەرلىك كورىنىسىمەن دە نازار اۋداردى. 17 - قىركۇيەك كۇنى وتكىزىلەتىن 5- ازيا ويىندارى اشىلۋ راسىمىندە وليمپيادا الاۋىنىڭ ەستافەتاسى، جىلقىنىڭ باسىنا ورناتىلعان پلاتفورمادا جاعىلماق.
احالتەكە جىلقىلارى تۇرىكمەنستاندا مادەني مۇرا رەتىندە قابىلدانادى. پرەزيدەنت گۋربانوگلى بەردىمۇحامەدوۆ احالتەكە جىلقىلارىنىڭ گەنەتيكاسىنىڭ ساقتالۋى، تانىتىلۋى جانە جىلقىنى قولدا ۇستاۋعا اسا ءمان بەرەدى. جىلقى باسىنىڭ ءمۇسىنى دە مۇنىڭ سيمۆولى بولىپ تابىلادى. جىلقى باسىنىڭ مۇسىنىنە قوسا، سۋ سپورتتارى ورتالىعى دا جابىق الاڭدا سالىنعان وليمپيادالىق ستاندارتتارداعى حاۋىزىمەن گيننەسس رەكوردتارى كىتابىنا ەندى.
فۋتبولدان «ۇلتتىق كۋبوك 2017» تۋرنيرىندە بايان- ولگەي قۇراماسى فينالدىق ويىندارعا جولداما الدى - KAZNEWS
ورحون ايماعىندا (وبلىس - اۆت.) فۋتبولدان «ۇلتتىق كۋبوك 2017» تۋرنيرىنىڭ ىرىكتەۋ كەزەڭدەرى ءوتتى، دەپ حابارلايدى KAZNEWS بايان- ولگي ايماعىنىڭ فۋتبول فەدەراتسياسىنىڭ باسپا ءسوز قىزمەتىنە سىلتەمە جاساپ.
اتالعان ب ا ق- تىڭ جازۋىنشا، جارىسقا موڭعوليانىڭ 18 ايماعىنان (وبلىس- اۆت.) جاساقتالعان قۇراما كوماندالار قاتىستى. بايان- ولگي ايماعىنىڭ فۋتبول كومانداسى ىرىكتەۋ كەزەڭىندە D توبىنان ەكىنشى بولىپ فينالدىق ويىندارعا جولداما الدى. «فۋتبولدان بايان- ولگەي ايماعىنىڭ قۇراما كومانداسى العاش رەت ءوز تاريحىنداعى جوعارعى كورسەتكىشكە يە بولىپ وتىر. بۇل ايماعىمىزدا فۋتبولدى دامىتۋعا بولاتىنىن كورسەتىپ وتىر. فۋتبولشىلارىمىزعا فينالدىق ويىندارىندا تەك عانا ساتتىلىك تىلەيمىز»، - دەيدى بايان- ولگەي ايماعىنىڭ فۋتبول فەدەراتسياسىنىڭ ءتوراعاسى امانتاي ءشامشي ۇلى.
اۆتور: باقىتجول كاكەش
