وڭتۇستىك جاستارى استانالىقتارعا 5 مىڭ قوراپ باۋىرساق تاراتتى - فوتو
و ق و مادەني كۇندەرى اياسىندا بۇگىن شارا تىزگىنىن قولىنا العان وڭتۇستىك جاستارى تاڭ سارىدەن باستاپ قالالىقتاردى دۋمانعا بولەدى. بۇگىن اراپا كۇنى بولعاندىقتان، جاس ورەندەر حالىققا باۋىرساق تاراتۋدى شەشكەن ەكەن. ول ءۇشىن ەلورادا كاسىبىن دوڭگەلەتكەن وڭتۇستىكقازاقستاندىق كاسىپكەرلەرمەن كەلىسىپ، ولاردىڭ مەيرامحانالارىندا باۋىرساق پىسىرگەن. باۋىرساقتى 5 مىڭ قوراپقا بولە سالىپ، بايتەرەك مونۋمەنتى ماڭىنان، «حان شاتىر» ساۋدا ورتالىعىنا دەيىنگى ارالىقتا جۇرگەن قالالىقتار مەن شاھار مەيماندارىنا تاراتىپ بەرگەن.
«حان شاتىر» مەن «كەرۋەن» ساۋدا ورتالىقتارى بۇل كۇنى توي- دۋمانعا اينالىپ كەتتى. دومبىرا مەن بايانعا قوسىلىپ شىرقاعان وڭتۇستىك جاستارى ونەرىمەن تامساندىرىپ كەتتى. بۇگىن، ياعني 31 تامى كۇنى كەشكى ساعات 20:00 ۋاقىتىندا بايتەرەك الاڭىندا وڭتۇستىك جاستارىنىڭ «استانانىڭ جۇلدىزدى ءتۇنى» اتتى دۋماندى ءبي كەشى ۇيىمداستىرىلماق. وندا وڭتۇستىكتەن شىققان ەستارادا جۇلدىزدارىنان «جىگىتتەر» كۆارتەتى، عازيزحان شەكەربەكوۆ، تانىمال بارابانشى «بۋرحان ستايل»، جاس انشىلەر «Boys band» تريوسى استانا اسپانىن سازدى اۋەنمەن تەربەسە، «GK» توبى زامانعا ساي برەيك ءبيىن پاش ەتىپ، «13-Legion» كلۋبىنىڭ جاستارى كوشە سپورتىنىڭ ونەرىن كورسەتەدى. كوڭىلدى تاپقىرلار كلۋبىنىڭ تالانتتارى كوپشىلىككە ازىلدەرىن ۇسىنادى.
«استانادا ءوتىپ جاتقان وڭتۇستىك قازاقستان وبلىسىنىڭ مادەني كۇندەرى اياسىنداعى شارانى ءبىزدىڭ جاستارىمىز دا تىس قالدىرماي وتىر. وڭتۇستىكتە قازىرگى تاڭدا 800 مىڭنان استام جاستار تۇرادى. دەمەك، 3 ميلليون حالىقتىڭ ايتارلىقتاي بولىگى جاس بۋىن. جاستىق جىگەر قايناپ تۇرعان كەزدە ونەرلى ءارى ەرىكتى جاستارىمىز ەلوردانىڭ تورىنە بارىپ، ونەرىن پاش ەتۋدى ءجون كورىپ وتىر. ودان بولەك، قاسيەتتى قۇربان ايت مەرەكەسى قارساڭىندا اراپا كۇنى مۇسىلمان حالقى باۋىرساق ءپىسىرىپ، تۋعان- تۋىستارىمەن قاۋىشىپ جاتادى. سوندىقتان، بۇگىن ءبىزدىڭ 150-دەن اسا قىز-جىگىت استانالىقتار مەن قالا قوناقتارىنا كادەسىي تاراتىپ جاتىر. بۇل دا «رۋحاني جاڭعىرۋ» باعىتىنداعى شارا دەپ تە ايتۋعا بولادى»، - دەيدى و ق و جاستار رەسۋرستىق ورتالىعىنىڭ باسشىسى بەرەك دۇيسەبەكوۆ.