قىتاي ازاماتشاسىنا عاشىق بولعان قازاق جىگىتى سۇيگەنىنەن 5 جىلعا ايىرىلدى

استانا. قازاقپارات - ق ر ىشكى ىستەر مينيسترلىگى سۇيگەن جارى - قىتاي ازاماتشاسىنا قوسىلۋعا جاردەم سۇراعان قازاق جىگىتىنىڭ ارىزىنا قاتىستى پىكىر ءبىلدىردى.

بۇدان بۇرىن تۇرسىن ءبورىباي ەسىمدى جىگىت abai.kz سايتىندا جاريالانعان حاتىندا ق ر ىشكى ىستەر ءمينيسترى قالمۇحانبەت قاسىموۆتان جۇبايى قىتاي ازاماتشاسى جازيرا يمانالىگە قوسىلۋعا جاردەمدەسۋدى سۇراعان بولاتىن.

جاس جۇبايلار ەكى جىل بۇرىن تانىسىپ، ءبىر-بىرىنە عاشىق بولىپ، جاقىندا ۇيلەنىپتى. الايدا عاشىقتار بىرگە بولا المايدى، ويتكەنى كوشى-قون زاڭناماسىن بۇزعانى ءۇشىن يمانالى بىلتىرعى جىلى قازاقستاننان شىعارىلىپتى. قازاق جىگىتىنىڭ جازۋىنشا، ءوزى وتباسىنىڭ كەنجەسى ەكەن، اكەسىنىڭ ميىنا قان قۇيىلىپ توسەك تارتىپ جاتقان كورىنەدى، بار ارمانى ۇلىنىڭ ۇيلەنۋ تويىن كورۋ ەكەن.

تۇرسىن ءبورىباي بۇل ماسەلە وڭ شەشىمىن تاپسا، قاسىموۆتى قۇرمەتتى قوناق رەتىندە ۇيلەنۋ تويىنا شاقىرۋعا ۋادە بەردى. ق ر ءى ءى م مەملەكەتتىك ءتىل جانە اقپارات دەپارتامەنتىنىڭ ديرەكتورى الماس سادۋبايەۆ ايتقانداي، قىز قازاقستانعا بىلتىر 7- ماۋسىمدا كەلىپتى، ءبىراق بەس كۇن ىشىندە ۋاقىتشا تىركەۋگە تۇرماي، 2016-جىلى 22- ماۋسىمدا عانا تىركەلۋگە كەلەدى. كوشى-قون زاڭناماسىن بۇزعان شەتەلدىك ارۋ اكىمشىلىك جاۋاپكەرشىلىككە تارتىلىپ، قازاقستان شەكاراسىنان شىعارىلدى.

سوت شەشىمىنىڭ نەگىزىندە كوشى-قون قىزمەتى قىزدىڭ 2021-جىلعى 29- ماۋسىمعا دەيىن ەلگە كەلۋىنە تىيىم سالادى. «حالىقتىڭ كوشى-قونى تۋرالى» زاڭنىڭ 48- بابىنا سايكەس، ق ر اۋماعىنان شىعارىلعان شەتەلدىكتەرگە قازاقستانعا كەلۋگە بەس جىلعا تىيىم سالىنادى. تالدىقورعان اۋدانارالىق اكىمشىلىك سوتىنىڭ شەشىمىنە شاعىم ءتۇسىرىپ، شەشىم وزگەرتىلگەن جاعدايدا كوشى-قون قىزمەتى قازاقستانعا كەلۋگە تىيىمدى الىپ تاستايدى»، - دەدى سادۋبايەۆ.