قازاقستان قىتايعا 5 ميلليارد تەكشە مەترگە دەيىن تابيعي گاز ەكسپورتتاماق
تاراپتار 2017-2018 -جىلدارى قازاقستاننان قىتايعا تابيعي گاز جەتكىزۋدىڭ مۇمكىندىگىن تالقىلاپ، 5 ميلليارد تەكشە مەترگە دەيىن گازدى ەكسپورتقا ساتۋ شارتىنا قول قويۋعا كەلىستى. قۇجات ءونىمدى جەتكىزۋ كولەمدەرىن، باعاسىن جانە ساپاسىن انىقتادى، سونداي- اق قىتاي تاراپىنىڭ گازدى قابىلداپ الۋ ورنى - «قورعاس» شەكارا بەكەتى دەپ بەلگىلەندى.
«قازمۇناي گاز» ۇ ك ا ق باسقارماسىنىڭ ءتوراعاسى ساۋات مىڭبايەۆ اتالعان مەموراندۋم، قازاقستان مەن قىتايدىڭ ەكىجاقتى ءوزارا ءتيىمدى ىنتىماقتاستىعىن ودان ءارى نىعايتۋعا مىقتى نەگىز بولىپ تابىلادى دەپ اتاپ ءوتتى.
«قازترانس گاز» ا ق ديرەكتورلار كەڭەسىنىڭ ءتوراعاسى قايرات شارىپبايەۆتىڭ پىكىرىنشە، قازاقستاندىق گازدى تاسىمالداۋدىڭ ترانزيتتىك جانە ەكسپورتتىق باعىتتارىن ءارتاراپتاندىرۋ، سونداي- اق كوگىلدىر وتىن ەكسپورتىنىڭ كولەمىن ۇلعايتۋ - مەملەكەت باسشىسى بەلگىلەگەن ستراتەگيالىق مىندەت.
«قىتايعا قازاقستاندىق گازدى ەكسپورتتاۋ تۋرالى ۋاعدالاستىققا قول جەتكىزۋگە ەكسپورتقا باعىتتالعان تاسىمال جۇيەسىن قالىپتاستىرۋ جونىندەگى وتە اۋقىمدى جانە كۇردەلى جۇمىستار ارقىلى قول جەتتى. اتاپ ايتقاندا، «بەينەۋ- بوزوي- شىمكەنت» گاز قۇبىرى سالىندى، «قازاقستان- قىتاي» ماگيسترالدىق گاز قۇبىرىنىڭ ءۇشىنشى تارماعىن پايدالانۋعا ەنگىزۋ جانە جوعارى تەحنولوگيالىق «بوزوي»، «قاراوزەك» كومپرەسسورلىق ستانتسيالارى مەن «اقىرتوبە» سىعىمداۋ كومپرەسسورلىق ستانتسياسىنىڭ سالىنۋىن ايتساق بولادى»، - دەدى ق. شارىپبايەۆ.
مامانداردىڭ ايتۋىنشا، قازاقستاندىق گازدى قىتايعا جەتكىزۋ ەكىجاقتى ءوزارا ءتيىمدى قارىم- قاتىناستارعا، سونداي- اق ەۋرازيا ەلدەرى اراسىندا ينفراقۇرىلىم قۇرۋعا جانە ساۋدا، كولىك بايلانىستارىن جولعا قويۋعا باعىتتالعان «ءبىر بەلدەۋ، ءبىر جول» باستاماسى شەڭبەرىندە ىنتىماقتاستىق قارىم- قاتىناستارىن بىرلەسىپ قامتاماسىز ەتۋگە جانە ىلگەرىلەتۋگە ىقپال ەتەتىن بولادى.
اۆتور: گۇلميرا عوسمانالي