تۋريستەرگە 5 جۇلدىزدى قوناق ءۇي كەرەك ەمەس - راشيدا شايكەنوۆا
راشيدا شايكەنوۆانىڭ ايتۋىنشا، الماتى وبلىسىنىڭ ەكولوگيالىق، ەتنولوگيالىق، كوشپەندىلىك جانە وقيعالىق تۋريزم مەن ەمدەۋ- ساۋىقتىرۋ تۋريزمىن دامىتۋعا الەۋەتى جەتەرلىك. الايدا، وعان كەدەرگى بولىپ وتىرعان ءبىرقاتار كەمشىلىك بار.
«ءبىزدىڭ باستى كەمشىلىگىمىز - الماتىدان تۋريستىك ورىندارعا اۆتوبۋس شىعارا الماۋىمىزدا بولىپ وتىر. ءبىزدىڭ الماتى وبلىسىنداعى 4 ۇلتتىق پاركتىڭ اراسىن جالعايتىن، ەكى كۇن سايىن قاتىنايتىن اۆتوبۋستار شىعارۋ تۋرالى كەلىسسوز ۇزاققا سوزىلىپ كەتتى. اپتا ورتاسىندا دەمالعىسى كەلەتىن تۋريستەرىمىز قىمبات باعاعا تاكسي جالداۋعا ءماجبۇر. الماتى وبلىسىندا تۋريزم دەمالىس كۇندەرى بەلسەندى بولادى. ارينە، بۇل اۆتوبۋستاردى شىعارۋ بىردەن تابىس اكەلمەيدى، سوندىقتان وعان دوتاتسيا كەرەك. بۇل ءبىر كۇننىڭ عانا شارۋاسى ەمەس»، - دەيدى راشيدا شايكەنوۆا.
راشيدا شايكەنوۆانىڭ ايتۋىنشا، بۇل ماسەلەنى تۋريستىك ورىندارعا جاقىن جەرلەردەن قوناق ۇيلەر اشۋ ارقىلى شەشۋگە بولادى.
«شەتەلدىكتەرگە ەكوتۋريزم ماڭىزدىراق. ونداي ساياحاتشىلار «بەس جۇلدىزدى» قوناق ۇيلەرگە ەمەس، ورتاڭقول قوناق ۇيلەرگە توقتايدى. الماتى وبلىسى اكىمدىگى مەن ەكو جانە اگروتۋريزمنىڭ ەۋروپالىق ورتالىعى اراسىندا قوناق ۇيلەر جۇيەسىن ازىرلەۋ جوباسى باستالدى. قازىرگى ۋاقىتتا تامعالى شاتقالىنا جاقىن جەردەگى اۋىلداردا قوناق ءۇي اشۋ ماسەلەسى قاراستىرىلىپ جاتىر. بۇل جەردە ەڭ ماڭىزدىسى ەۋروپالىق ماماندار جەرگىلىكتى مامانداردى قوناق ۇيلەر ستاندارتى مەن تاماقتاندىرۋ قىزمەتىنىڭ ساپالى بولۋىن ۇيرەتەدى. قوناق ۇيلەر جۇيەسىن دامىتساق، جاستار قالاعا جۇمىس ىزدەپ سابىلمايدى»، - دەيدى راشيدا شايكەنوۆا.
ايتا كەتەيىك، الماتى وبلىسىندا 2014 -جىلى تۋريزمدى دامىتۋدىڭ ماستەر- جوسپارى جاسالعان بولاتىن. ەكى جىل ىشىندە تۋريستەر قاتارى 3,5 ەسەگە ءوستى. بۇل جەردە الاكولدىڭ دە ورنى بولەك. 2012-2013 -جىلدارى الاكولدە 58 مىڭ ادام دەمالسا، بىلتىر 452 مىڭ ادام بارعان. بيىلعى جىلى الاكولدە 26 جاڭا نىساننىڭ قۇرىلىسى باستالماق. سونىمەن قاتار، ءۇشارالدان اۋەجاي اشىلسا، كولگە جاقىن اقشي اۋىلىنا دەيىن باراتىن پويىز قاتىنايدى. 2017 -جىلى بالقاش مەن كولسايعا اپاراتىن جولدار دا جوندەلمەك.
اۆتور: الماس مۇقاش ۇلى
