شەتەلدەگى 5 ميلليون قانداسىمىز جەرسىز قالمايتىن سياقتى
پارلامەنتتە جەر قاتىناستارى تۋرالى زاڭ جوباسىن تالقىعا سالعان دەپۋتاتتار مەن بەلسەندىلەر وسىنداي ۋادە بەرىپ وتىر دەپ حابارلايدى 31- ارنا.
ءبىر جىل بويى جۇمىس ىستەگەن جەر تۋرالى كوميسسيامەن بىرلەسە ازىرلەنگەن جاڭا زاڭ جوباسى ماجىلىسكە تانىستىرىلدى. اۋىل شارۋاشىلىق ۆيتسە-ءمينيسترىنىڭ ايتۋىنشا، جايىلىمدىق جەرلەر جۇرتقا 49 جىلعا جالعا بەرىلەدى، تەلىمدى الۋ بايقاۋ ارقىلى اشىق وتپەك.
الايدا بەلسەندىلەر اۋىل جاستارى بوس جاتقان جەرلەرگە لاتيفۋنديستەردىڭ كەسىرىنەن يەلىك ەتە المايتىنىن ايتتى.
«لاتيفۋنديزمگە قارسى نورمالار وتە ماڭىزدى. مۇنى باقىلاۋ ءۇشىن زاڭ جوباسىنا اشىق كاداستر ەنزىگۋمىز كەرەك. ويتكەنى جەر جەكەمەنشىك ەمەس»، - دەيدى جەر كوميسسياسىنىڭ مۇشەسى مۇحتار تايجان.
سونداي-اق جەر كوميسسياسىنىڭ مۇشەسى مۇحتار تايجان ۇكىمەتتەن شەتەلدەگى 5 ميلليون قانداسىمىزدى دا ۇمىتپاۋدى سۇرادى. ەلگە ورالعىسى كەلەتىن وتانداستارىمىزعا جەردىڭ 10 پايىزىن ساقتاپ قالۋدى ۇسىندى.
ال دەپۋتاتتار جەردى جالعا بەرۋ ءۇشىن وتكىزىلەتىن بايقاۋعا اۋىل ادامدارىنىڭ قاتىسۋ جاعى زاڭدا قاراستىرىلماعانىن ايتتى. ءتىپتى، تەلىمدەردى تاراتۋ كەزىندە بارماق باستى كوز قىستىعا جول بەرمەۋ ءۇشىن ونلاين رەجيمدە وتكىزەيىك دەگەن ۇسىنىستار دا ايتىلدى.
سونداي-اق مەملەكەتتىك مۇقتاجدىق ءۇشىن جەردى ساتىپ الۋ كەزىندە بەرىلەتىن وتەماقى ماسەلەسى دە ءسوز بولدى. ويتكەنى، ۇكىمەتتىڭ ۇسىنعان اقشاسىمەن كەلىسپەي، تالاي ادام زار ەڭىرەپ دالادا قالعان بولاتىن.
الايدا قۇجاتتى ازىرلەگەندەر ارزانعا ەمەس، نارىقتىق باعامەن ساتىپ الاتىن نورما ەنگىزىلەدى دەگەن ۋادە بەرىپ وتىر.
«كاداسترلىق باعاسى ەمەس، سول كەزدەگى نارىقتىق باعامەن الۋعا. وسى ۇسىنىستى ەنگىزەمىز»، - دەيدى اۋىل شارۋاشىلىعى ۆيتسە-ءمينيسترى ەرلان نىسانبايەۆ.
