وتباسىن قۇرعانعا دەيىن ءبىلۋ كەرەك 5 نارسە

استانا. قازاقپارت -  وتباسى -  اياداي عانا مەيىرىمدىلىك پەن سۇيىسپەنشىلىككە تولى سەنىڭ وتانىڭ. وتباسىن قۇرۋ ءاربىر ازامات پەن ازاماتشا ءۇشىن پارىز. سەبەبى ۇرپاقتار ساباقتاستىعىن جالعاستىرۋشى، تاربيە مەن ءبىلىمدى، ادەپتى قالىپتاستىرۋشى ورتا وسى وتباسى.

دەگەنمەن وتباسىن بىردەن قۇرۋ دا، ونىڭ جاۋاپكەرشىلىگىن ارقالاۋ دا وڭاي ەمەس. سوندىقتان وتباسى بولماي تۇرىپ ءبىز ۇسىنعان بەس كەڭەسكە نازار اۋدارىڭىز.

1. «ماڭگىلىك ماحاببات» جالعاسىن تابا بەرمەيدى. ءسىزدىڭ جارىڭىز -  بالاڭىز ەمەس، ءسىزدىڭ سەرىكتەسىڭىز. ەكەۋىڭىز ءومىردىڭ سوڭىنا دەيىن بىرگە بولاتىن دوس ەكەندەرىڭىزدى ۇمىتپاڭىزدار. جارىڭىز ءسىزدى ءسات سايىن ءسۇيىپ وتۋىنە كەپىلدىك جوق. بۇل ەكەۋىڭىزگە دە قاتىستى ايتىلعان كەڭەس. «ماڭگىلىك ماحابباتتىڭ» داستانىن «ماڭگىلىك سىيلاستىق» ءۇردىسى جالعاستىرادى. ەڭ سەنىمدى جانە وتباسىلىق ءومىردى ۇزاعىنان ساقتاۋعا، ماڭگى بىرگە تاتۋ- ءتاتتى ءومىر سۇرۋگە جەتەلەيتىن وسى سىيلاستىق ەكەنىن ەسكەرىڭىز.

 2. ءسابي دۇنيەگە كەلگەننەن كەيىنگى العاشقى ەكى جىل قيىندىق تۋدىرۋى مۇمكىن. ءسابي -  وتباسى ءومىرىنىڭ تۇتقاسى. كوز قۋانىشى، بۇكىل سەزىمىڭىزدىڭ كەپىلى. ءبىراق العاش دۇنيەگە كەلگەن ءسابيدىڭ وتباسىندا قولايسىزدىق تۋدىرۋى مۇمكىن. بۇل ارينە جاماندىق شاقىرۋ ەمەس، تەك وتباسىن قۇرماستان بۇرىن دايىن بولۋ كەرەك جاعداي. ۇيقىڭىز قانبايدى، ءتۇن ۇيقىڭىزدى ءتورت بولەسىز. شارسايسىز. مازاسىزداناسىز. جاۋاپكەرشىلىك ءبىر ەمەس، ون ەسەگە ارتادى. ال بۇل قاسيەتتەر مەن سەزىمدەردى باستان كەشىپ كورمەگەن ءسىز ءۇشىن جانە سىزدەر ءۇشىن اتالعان جاعداي كۇيزەلىس بولۋى ابدەن مۇمكىن.

3. جۇبىڭىزدى ۇسقا- تۇيەك نارسەمەن بولسا دا قۋانتىپ تۇرىڭىز جارىڭىزدىڭ كوڭىلىن تابۋ ءۇشىن ۇلكەن سىيلىق نەمەسە گۇل الىپ بەرۋ مىندەتتى ەمەس. وتباسىنىڭ تۇراقتىلىعىن ساقتايتىن سوزدەر دە بار. بۇل سوزدەر ءسىزدىڭ سىيلىعىڭىزدان قىمبات: «جانىم» ، «سۇيىكتىم» ، «قىمباتتىم» دەگەن سىندى ەركەلەتۋگە باعىتتالعان سوزدەر ءسىزدى دە، ونى دا باقىتتى ەتەدى. ەسىكتەن كىرىپ كەلگەن كەزدەگى ءبىر- بىرىڭىزگە دەگەن جىلى ءسوز اق داستارحان باسىنداعى تىنىشتىقتىڭ كەپىلى.

 4. ءبىرىڭىزدى- ءبىرىڭىز قولداۋدان قالۋ -  قاتەلىكتىڭ ۇلكەنى. وتباسى بولعاننان كەيىن بارلىق ماسەلەنى بىرىگىپ شەشكەن دۇرىس. بۇل بىرىنشىدەن ەكەۋارا سەزىنۋگە، سىيلاستىققا الىپ كەلەدى. ەرتەڭ وتباسى بولعاننان كەيىن ءبىرىڭىز عانا جۇمىس ىستەپ، ءبىرىڭىز عانا ماسەلەنى شەشۋدە كيكىلجىڭ تۋىنداۋى مۇمكىن. مۇنداي جاعداي تۋىنداعان ساتتە ارالارىڭىزعا سەلكەۋ ءتۇسىپ، قولداۋدان قالىپ، سەنىمنەن ادا بولاسىزدار. قانداي ارەكەت، قانداي ماسەلە بولماسىن ايتىڭىز، ەسكەرتىڭىز، بىرگە شەشىڭىز. وتباسى ومىرىندە جەكە باس ماسەلەسى نەمەسە «ول مەنىكى، مىناۋ سەنىكى» دەيتىن ۇستانىم بولماۋى كەرەك.

 5. جۇمىس كۇشىن ءسوز قىلماڭىز: سەن ۇيدە وتىرىپ بالا باعاسىڭ نەمەسە سەن سىرتتا جۇمىستاسىڭ.. . بۇل ماسەلەنى ءتىپتى قوزعاماڭىز. ويىڭىزعا دا الماڭىز. ءسىز ەكەۋىڭىز وتباسىلىق ومىرگە قادام باسقاننان كەيىن ءوز جۇمىستارىڭىزدى بۇرىن قالاي جاساپ كەلدىڭىزدەر، سولاي جاساۋعا مىندەتتىسىزدەر. تەك جاۋاپكەرشىلىك ارتادى. سۇيىكتىڭىزگە «سەن سىرتتا جۇمىستاسىڭ مەن ۇيدە بالا باعامىن، شارشادىم» ، -  دەمەڭىز، ال ءسىز جارىڭىزعا «مەن جۇمىس ىستەيمىن، سەن بالا عانا باعاسىڭ عوي» دەگەن ءسوزدى مۇلدە ايتپاڭىز. بۇل ويدى ۇمىتىڭىز. باقىتقا بىرگە جەتىڭىز!

 

Massaget.kz