كۇنا جاساۋعا بولاتىن 5 نارسە
بۇل تۋرالى islam.kz حابارلايدى.
بىردە يبراھيم يبن ادحامعا ءبىر زالىم ادام كەلىپ:
- مەن كۇنا جاساماي جۇرە المايمىن، سوندىقتان ماعان كومەكتەسەتىن الدەبىر نارسەنى كەڭەس ەتشى، - دەيدى. يبراھيم:
- ەگەر سەن مەن ايتقان بەس نارسەنىڭ بىرەۋىن ورىنداساڭ، قانشا قالاساڭ دا كۇنا جاساي الاسىڭ جانە اللا تاعالانىڭ بۇيرىعىنا قۇلاق اسپاعانداردىڭ قاتارىنان بولمايسىڭ، - دەپ ءسوزىن جالعاستىرادى. - ءبىرىنشى، ەگەر سەن كۇنا جاساپ، اللاعا قۇلاق اسقىڭ كەلمەسە، ونىڭ بەرگەن نەسىبەسىنەن جەمە.
- وسى دۇنيەدەگى بۇكىل نەسىبە اللاعا تيەسىلى بولسا وعان تيەسىلى ەمەس نەسىبەنى قايدان الامىن؟ - دەيدى الگى ادام.
- وندا اللا تاعالانىڭ بەرگەنىن جەپ، وعان قالاي قۇلاق اسپايسىڭ؟ - دەيدى يبن ادحام كەيىپ.
- ەكىنشى، ەگەر اللاعا قۇلاق اسقىڭ كەلمەسە، ونىڭ جەرىن تاستاپ، وعان تيەسىلى ەمەس جەرلەرگە بارىپ تۇر.
- ءبىراق بارلىق جەر مەن كوك اللاعا تيەسىلى عوي. كۇنا جاساۋ ءۇشىن مەن قايدا بارۋىم كەرەك؟ - دەيدى الگى ادام.
- سوندا سەن اللا تاعالانىڭ جەرىندە، ونىڭ يەلىگىندە تۇرىپ وعان قالاي قۇلاق اسپايسىڭ؟ - دەيدى يبراھيم.
- ءۇشىنشى، كۇنا جاساعىڭ كەلگەن كەزدە ءوزىڭدى اللا تاعالا كورمەيتىن جەرگە بار.
- و، يبراھيم، سەن نە ايتىپ تۇرسىڭ؟ ونداي جەردى مەن قايدان تابامىن؟ اللا تاعالا كورمەيتىن جەر جوق قوي، - دەيدى الگى ادام.
- سەن اللا تاعالانىڭ كورمەيتىن جەرى جوق ەكەنىن بىلە تۇرىپ، ونىڭ سەن نە ىستەسەڭدە كورەتىنىن بىلە تۇرىپ قالاي عانا كۇنا جاساماقسىڭ؟ - دەيدى يبراھيم.
- ءتورتىنشى، جانىڭدى الۋعا اجال پەرىشتەسى كەلگەندە، كۇنالارىڭا تاۋبە ەتۋ ءۇشىن ونىڭ كۇتە تۇرۋىن سۇرا.
- بۇل مۇمكىن ەمەس قوي، اجال پەرىشتەسى ەشكىمگە ۋاقىت بەرمەيدى عوي - دەيدى الگى ادام.
- سوندا سەن كەز- كەلگەن ساتتە اجال پەرىشتەسى كەلىپ جانىڭدى الۋى مۇمكىن ەكەنىن بىلە تۇرا اللا تاعالانىڭ بۇيىرعانىنا قالاي قۇلاق اسپايسىڭ؟ - دەپ سۇرايدى يبراھيم. سۇراعىنا جاۋاپ بولماعان سوڭ ءسوزىن جالعاستىرىپ: - جانە ەڭ سوڭعى بەسىنشى شارت. سونى ورىنداساڭ، قالاۋىڭشا كۇنا جاساي الاسىڭ. توزاققا جاۋاپتى پەرىشتەلەر سەنى توزاققا جەتەكتەگەندە وندا بارۋدان باس تارت، - دەيدى. سول كەزدە ايتارعا جاۋابى، جاسارعا امالى قالماعان الگى ادام سول جەردە جىلاپ، قاتەسىن ءتۇسىنىپ، كۇنا جاساۋدى قويىپ، دۇرىس جولعا تۇسكەن دەسەدى.
Stan.kz
