قىتايدا ديماش تۋرالى انيماتسيانى تاماشالاعاندار سانى 5 ميلليوننان اسىپ كەتتى

بەيجىڭ. قازاقپارات - قىتايدا ديماش قۇدايبەرگەننىڭ جانكۇيەرى انشىگە ارناپ قۇمنان ادەمى بەينە سالۋعا قاتىستى ۆيدەوروليك ءتۇسىردى.

ول ءبىر اپتاعا جەتپەيتىن ۋاقىت ىشىندە 5 ميلليوننان استام رەت كورىلدى، دەپ حابارلايدى قىتايداعى قازاقپارات ءتىلشىسى. Powder animation دەپ اتالاتىن قۇممەن سۋرەت سالۋ تەحنيكاسى كومەگىمەن جاسالعان مۋلتيپليكاتسيالىق فيلمدى قىتايلىق Weibo جەلىسىنە «MingzheSS» اتتى پايدالانۋشى 5- اقپان كۇنى جۇكتەگەن.

روليككە Singer بايقاۋىنىڭ ءۇشىنشى كەزەڭىندە ديماش قۇدايبەرگەننىڭ شىرقاعان «Show must go on» ءانى تاڭدالىنىپ الىنعان. 11- اقپاندا ۆيدەونى تاماشالاعاندار سانى 5 ميلليون 230 مىڭعا جەتكەن.

ەسكە سالا كەتسەك، قازاقستاندىق ديماش قۇدايبەرگەن قىتايدا «Singer» بايقاۋىنا قاتىسىپ جاتىر. استانا ۋاقىتىمەن 11- اقپان كۇنى ساعات 20.30-دا Hunan.TV تەلەارناسىنان بايقاۋدىڭ 4-كەزەڭى كورسەتىلەدى.

بۇل كەزەڭدە ديماش قۇدايبەرگەن قىتاي تىلىندەگى «كۇزگى مۇڭ» ءانىن اكتسەنتسىز ايتىپ، ءۇشىنشى ورىن يەلەنگەن بولاتىن. بايقاۋدىڭ ۆيدەوسىن تەلەديداردان كورگەن قىتايدىڭ ايگىلى كينو اكتەرى دجەكي چان ديماشپەن كەزدەسىپ، ءوزىنىڭ ەكسكليۋزيۆتى كۇرتەشەسىن سىيعا تارتىپ، سوڭعى «Kung Fu Yoga» كينوكارتيناسىنداعى ءبي قيمىلدارىن ۇيرەتتى.

اۆتور: جانىبەك امانگەلدى