قازاقستاندىقتارعا كۇناسىن كەشىرگەن اتى شۋلى 5 وقيعا

استانا. قازاقپارات - ەلىمىزدە زاڭدى بۇزسا دا، جازاسىز قالعان قاندى وقيعالار كوپ. مۇنىڭ بارلىعى ءتارتىپ ساقشىلارىنىڭ قاۋقارسىزدىعىنان ەمەس، ەكى تاراپتىڭ تاتۋلاسۋىمەن بولعان وقيعالار.

 Stan.kz كەزەكتى ماتەريالىندا قازاقستاندىق قىلمىسكەرلەرگە كەشىرىم بەرىلگەن اتى شۋلى وقيعالاردى توپتاستىردى.

شىمكەنتتە اكە ءوزىنىڭ ۇلىن ولتىرگەن قىلمىسكەردى كەشىردى

2009 -جىلى قالىڭ باقتيار ۇلىن شىمكەنت وقۋ ورىندارىنىڭ بىرىندە ءبىلىم الىپ جاتقان وقۋشىلار ۇرىپ- سوعىپ، توناپ كەتەدى. وسىدان كەيىن ول دوستارىن جيناپ، ءوزىن جابىرلەگەندەردەن كەك الماق بولادى. جاستار اراسىنداعى قاقتىعىس كەزىندە 18 جاستاعى شاقۇر يشانعا وق ءتيىپ، وقيعا ورنىندا قايتىس بولادى. قىلمىسكەر ءتارتىپ ساقشىلارىنان قاشىپ جۇرسە دە، 6 جىل بويى الگى جىگىتتىڭ اتا- اناسىنا اقشا جىبەرىپ تۇرعان. شىمكەنت سوتى ونىڭ بۇل ارەكەتىنە قاراماستان، 10 جىلعا باس بوستاندىعىنان ايىرادى. سوڭىندا شاقۇر يشاننىڭ اكەسى ونى كەشىرىپ، زاڭ وكىلدەرىنەن قىلمىسكەردىڭ ۇستىنەن ءىس قوزعاماۋدى سۇرايدى.

كوڭىلدەسى ءوزىن ولتىرمەك بولعان اكىمدى كەشىردى

2014 -جىلى بۇرىنعى اكىمنىڭ كوڭىلدەسى ودان قىز تۋعان. ايەل شەنەۋنىكتەن ءوزىنىڭ بالاسىن رەسمي مويىنداۋدى سۇراعان ەكەن. مويىنداماعان جاعدايدا، ارا- قاتىناستارى تۋرالى جۇرتقا جاياتىنىن ايتىپ قورقىتقان. سەرىكقاليەۆ سەسكەنىپ، الگى ايەلدى جەندەتتەرگە ولتىرتپەك بولادى. بۇل ءۇشىن 500 مىڭ تەڭگە اقشا ۇسىنادى.

جۇرگىزۋشى اكىمنىڭ بۇل ۇسىنىسىنا كەلىسىپ، ايەلدى پىشاقتايدى. ارتىنشا ۇيالى تەلەفونىن تارتىپ الادى. ايەل جۇرتتى كومەككە شاقىرىپ ۇلگەرگەندىكتەن، جەندەت ءوز جۇمىسىن اياعىنا دەيىن جەتكىزە الماي قالادى. اۋدانارالىق ارنايى سوت سەرىكقاليەۆتى 11 جىلعا باس بوستاندىعىنان ايىرعان بولاتىن. الايدا ايەل سوت وتىرىسى بارىسىندا بۇل ۇكىممەن تولىقتاي كەلىسپەيتىنىن ايتادى. «ول كىنالى ەمەس، مەن مۇنى ناقتى بىلەمىن»، - دەيدى ايەل.

باتىس قازاقستان وبلىسىنىڭ اپەللياتسيالىق كوللەگياسى تەرەكتى اۋدانىنىڭ ەكس اكىمى جەڭىس سەرىكقاليەۆكە قاتىستى ۇكىمدى وزگەرىسسىز قالدىردى. مۇنىمەن قاتار، ونىڭ جاقتاستارى ارمان قوجامۇراتوۆ پەن جۇرگىزۋشى بەيىمبەت يسماعامبەتوۆتىڭ دا شاعىمدارى قارالمايتىن بولدى.

«اپەللياتسيالىق شاعىمىندا سالىمگەرەييەۆا سەرىكقاليەۆپەن جاقسى قارىم- قاتىناستا بولعانىن، قىزدارىن وسى كۇنگە دەيىن بىرگە تاربيەلەپ كەلگەنىن ايتتى. مۇنىڭ بارلىعى كەلتە- حاتپەن راستالدى. مۇنىمەن قاتار، جابىرلەنۋشى كوڭىلدەسىنەن ماتەريالدىق كومەك سۇراماعانىن تىلگە تيەك ەتتى. ياعني سەرىكقاليەۆتىڭ ونى ولتىرۋىنە ەش سەبەپ جوق»، -  دەيدى سوت ءتوراعاسى مەيرامبەك ناعاشبايەۆ. ناتيجەسىندە اپەللياتسيالىق كوللەگيا ۇكىمدى وزگەرىسسىز قالدىردى.

بايان ماقسات قىزى كۇيەۋىنە قاتىستى شەشىمىن وزگەرتتى

10 - ماۋسىمدا بايان ەسەنتايەۆا پىشاق جاراقاتىمەن اۋرۋحاناعا تۇسكەن ەدى. قىلمىس جاسادى دەگەن كۇدىكپەن ونىڭ كۇيەۋى باقىتبەك ەسەنتايەۆ ۇستالعان. بۇدان بۇرىن وعان «دەنساۋلىققا اۋىر زيان تيگىزۋ» دەپ اتالاتىن ق ك- ءتىڭ 106-بابى بويىنشا ايىپ تاعىلعان بولاتىن. سودان كەيىن بۇل باپ «ادام ولتىرۋگە وقتالۋ» دەگەن اناعۇرلىم اۋىر باپقا وزەرتىلدى. ال 14 - قىركۇيەكتە الماتى وبلىسىنىڭ اۋداندىق سوتىندا تانىمال پروديۋسەردى قاتىگەزدىكپەن سوققىعا جىعۋ تۋرالى ءىس بويىنشا پروتسەسس باستالدى.

 باقىتبەك ەسەنتايەۆ ءوز جۇبايىن ولتىرۋگە وقتالدى جانە زورلادى دەپ ايىپتالدى. كۇنى كەشە تاعى دا سوت وتىرىسى ءوتىپ، بايان ەسەنتايەۆا ءوزىنىڭ بۇرىنعى كۇيەۋىنە كەشىرىم بەردى. كەشىرىم بەرۋىنىڭ سەبەبىن بىلاي ءتۇسىندىردى: «مەن ونى كەشىردىم، بۇل مەنىڭ شەشىمىم. مەن بۇل بەتتى پاراقتاپ بولدىم، ءومىرىم ءارى قاراي جالعاسادى. مەنىڭ بالالارىمنىڭ اكەسى بار، ال ءوزىم ءوز باقىتىمدى ىزدەيمىن». الايدا سوت ءىس باقىتبەك ەسەنتايەۆتىڭ اۋىر قىلمىس جاساعانى ءۇشىن قوزعالعاندىقتان، ول قىلمىستىق جاۋاپكەرشىلىكتەن بوساتىلمايدى.

بويجەتكەن 15  جىلدان كەيىن ءوزىن زورلاعان ازاماتقا ۇيلەندى

باۋىرجان ەسىمدى ازامات تىكەلەي ەفيرگە حابارلاسىپ، 18 جىل بۇرىن ءبىر قىزدى زورلاعانىن ايتتى. وسى وقيعادان كەيىن ازاماتتىڭ بالاسى شەتىنەپ، اتا- اناسى قايتىس بولادى. ءوزى ىشىمدىككە سالىنىپ، ومىرىمەن قوش ايتىسۋعا بەل بۋادى. الايدا تۇسىندە الگى قىزدى كورىپ، ارتىنشا 2  جىل سەگىز اي بويى ونى ىزدەيدى. تاپقان سوڭ كەشىرىم سۇراپ، تۇرمىسقا شىعۋ تۋرالى ۇسىنىس جاسايدى. ءدال قازىر وتباسىنىڭ ءبىر ۇلى مەن ەگىز قىزى بار. ءسوز سوڭىندا باۋىرجان جۇرتقا جاساعان جاماندىقتىڭ وزىڭە مىندەتتى تۇردە قايتىپ كەلەتىنىن ايتتى.

 قۇرالاي ەسىمدى ارۋ وسى ۋاقىت ىشىندە ەشكىمگە ۇيلەنبەگەن. وسى وقيعادان كەيىن بالاسىن الدىرماي، اۋىلعا قايتىپ كەتكەن. ءبىراق بالا تۋرالى باۋىرجانعا ءتىس جارماعان. ءتىپتى ءوزى تۋرالى ەستىرتپەۋگە تىرىسقان. الايدا 15 جىل وتكەن سوڭ، ول باۋىرجاندى كەشىرىپ، وتباسىن قۇرۋعا كەلىسىمىن بەرەدى.

كىسى ولتىرگەن ۇسەنوۆ اكىمشىلىك جازامەن شەكتەلدى

الماتى تۇرعىنى ماقسات ۇسەنوۆ 2013 -جىلى ماس كۇيىندە كولىك ايداپ، 6 ادامدى قاعىپ كەتكەن بولاتىن. ودان ءبىر جىگىت قازا تاپتى. ەكىنشى رەت ماقسات ۇسەنوۆ تىزگىندەگەن كولىك تويوتا كولىگىمەن سوقتىعىسىپ، 38 جاستاعى كەلىنشەكتىڭ دەنساۋلىعىنا زاقىم كەلتىرگەن بولاتىن. ەكى جاعدايدا دا ۇسەنوۆ تاراپتاردىڭ كەشىرىمىن الىپ، اكىمشىلىك جازامەن شەكتەلدى. BMW 23 كولىگى قاعىپ قايتىس بولعان مۇرات قاراباليننىڭ تۋىستارى ۇسەنوۆكە كەشىرىم بەرگەن.

«بىلەسىزدەر مە، ۇسەنوۆتىڭ تەرىس جانە وڭ جاقتارى دا بار. تەرىس جاعى ونىڭ ىستەگەن ءىسى. سول ۋاقىتتا ءبىز، قۇقىق قورعاۋ ورگاندارى حالىققا دۇرىس تۇسىندىرە المادىق. سوندىقتان الەۋمەتتىك جەلىدە ادامدار تالقىلاي باستادى. قاراپايىم تۇردە عانا ءتۇسىندىرۋ كەرەك ەدى. ۇسەنوۆ ءتورت ءتۇرلى قۇقىق بۇزدى. ءبىرىنشىسى قىلمىستىق، ۇشەۋى اكىمشىلىك. ق ر- نىڭ قولدانىستاعى قىلمىستىق كودەكسىنە سايكەس، ەگەر كىنالى جانە زارداپ شەگۋشى تاراپ تاتۋلاسسا، وندا پروكۋرور دا، سوتتا، ەشكىمدە ونى جويا المايتىندىعىن ايتۋ قاجەت ەدى. بۇل ەكى تاراپتىڭ بۇعان دەيىنگى قۇقىعى ەدى. ونى ولار پايدالاندى. مۇندا ەشقانداي جەمقورلىق ارەكەت جوق»، - دەدى باس پروكۋرور.