نۇرتاس ادامباي: «تاراز» فيلمىن ءتۇسىرۋدى 5 رەت توقتاتپاق بولدىم
«شىنىن ايتقاندا، «تاراز» فيلمىن تۇسىرۋگە دايىندىق بارىسىندا جوبانى توقتاتۋعا 5 رەت ارەكەتتەندىم. كومەديا تۇسىرگەننەن دراما شىعارۋ ايتارلىقتاي قيىن ەكەن. مەن، بۇل جوبا «سابينا كەلىن» فيلمىندەي ناتيجەلى بولۋى ءۇشىن ۇلكەن تاۋەكەلگە بارۋ قاجەتتىگىن تەرەڭ ويلادىم. سويتە تۇرا، كىرىسىپ كەتتىك»، - دەپ جازدى ول ينستاگرام الەۋمەتتىك جەلىسىندەگى جەكە پاراقشاسىندا.
پروديۋسەردىڭ ايتۋىنشا، ءتۇسىرىلىم بارىسىندا ول بۇعان دەيىن كينومەن شۇعىلدانىپ كورمەگەندەي سەزىمدە بولعانىن ايتتى.
«جاڭالىق كوپ بولدى. قارجى شىعىنى كۇننەن كۇنگە ءوسىپ بارا جاتقانىن كورىپ وتىردىم. ءبىزدىڭ فيلم بيۋدجەتىنە سەل قۇيىلعانداي بولدى، ءبىراق شەگىنۋگە بولمايتىن ەدى... ءتۇسىرىلىم توبى مەن اكتەرلەردىڭ ىنتاسىن كورىپ، مەن، فيلم قالايدا ءتۇسىرىلۋى كەرەك ەكەنىن ۇقتىم. وسىدان كەيىن پوست-پرادكشن ۋاقىتى سارىلتتى، مونتاج، ءتۇسىن وڭدەۋ، اۋەن، دىبىس... كوپ كۇش، كوپ قارجى (ءبىز ءۇشىن بۇل وراسان زور اقشا) جۇمسالدى. ءبىراق، «تارازعا» جانىن سالعان توپتىڭ جۇمىلعان جۇدىرىقتاي بولعانىن اتاپ ايتۋعا بولادى. ماعان اقشا ءۇشىن ەمەس، ادامداردىڭ يدەيا ءۇشىن بىرىككەنىن كورۋ قۋانىش بولدى»، - دەيدى ن. ادامباي.
رەجيسسەر «تاراز» فيلمى لوس-اندجەلەستەگى فەستيۆالدە 2- جۇلدەلى ورىنعا قول جەتكىزگەنىن ەستىگەندە، ەڭبەكتىڭ زايا كەتپەگەنىن تۇسىنگەنىن ايتادى.
«ەندى ءوز كورەرمەنىمىز ءبىزدىڭ ەڭبەكتى باعالايدى دەپ ۇمىتتەنەمىن. دوستار، كينوعا كەلىڭىزدەر. ءبىز سىزدەر ءۇشىن ەڭبەك ەتتىك»، - دەپ ءسوزىن تۇيىندەدى شوۋمەن.
ەسكە سالا كەتەيىك، نۇرتاس ادامبايدىڭ «تاراز» فيلمى ونىڭ دراما جانرىنداعى العاشقى كينو كارتيناسى. اتالعان فيلم ا ق ش- تاعى «Genre Celebration Film Festival» بايقاۋىندا بىردەن ەكى نوميناتسيا بويىنشا سىيلىققا يە بولدى.
اۆتور: الماس مۇقاش ۇلى
