كۇزگى ساياحاتقا قولايلى 5 تاماشا ەل - فوتو
جازدىڭ ىستىعى باسىلعاندا ساياحاتتاۋدىڭ التىن شاعى باستالادى. Buro 24/7 رەداكتسياسى قازان ايىندا بارۋعا قولايلى بەس ۇزدىك مەملەكەت ۇسىنادى.
باۆاريا، گەرمانيا
«كۇزگى» تىزىمگە مىندەتتى تۇردە گەرمانيا كىرەدى. كوك توبەسى كوپ، ەسكى اۋىلدارىمەن بەلگىلى، قالىڭ تۇمان باسقان ورماندى ولكە قازان ايىندا ءتىپتى كوركەيە تۇسەدى. وعان سەبەپشى - وكتوبەرفەست اتتى الەمدەگى ەڭ ۇلكەن حالىق سەرۋەنى. بۇل 16 كۇندىك مەيرام باۆاريانىڭ ەگىن جيناۋ كۇنى بولىپ تۋىنداعان. ناعىز ءداستۇرلى ەۋروپالىق جارمەنكەنىڭ رۋحىن وسىندا سەزىنۋ مۇمكىن. فەستيۆال كەزىندە اتتراكسيوندار مەن كونسەرتتىك ساحنالار جۇمىس ىستەيدى، مەرگەندەر شەرۋى جانە كوستيۋمدى شەرۋلەر وتەدى، جارىستار مەن سىرا دەگۋستاتسيالارى ۇيىمداستىرىلىپ جاتادى.
كيوتو، جاپونيا
تۋريستەر جاپونياعا جىلىنا ەكى رەت كەلەدى. ءبىرى - ساۋىردە ساكۋرا گۇلدەگەن كەزدە. ەكىنشىسى - قازان ايىندا تانىمال موميدزي ۇيەڭكىلەرى بۇكىل ەلدى القىزىل تۇسكە اينالدىراتىن شاقتا. ونى «كويو» دەپ اتايدى. قاي كۇنى، قاي تال القىزىل تۇسكە بويالاتىنىن جىبەرىپ الماس ءۇشىن، مەترو بەكەتتەرى مەن گازەت ساتاتىن دۇكەندەردە ارنايى كارتا تابۋعا بولادى. كيوتونىڭ باستى كورىكتى جەرلەرىنىڭ ءبىرى - كيەميدزۋ- دەرا بۋددا عيباداتحاناسىنا مىندەتتى تۇردە بارىپ شىعۋ قاجەت. بۇل «كويو» ماۋسىمىنداعى اسا ادەمى ورىنداردىڭ ءبىرى بولىپ تابىلادى. ونداعى شىڭنان جاپونيانىڭ ەڭ اسەم كۇزگى تابيعات كورىنىستەرىن تاماشالاي الاسىز.
ترانسيلۆانيا، رۋمىنيا
قازان ايىندا ترانسيلۆانيانىڭ ونسىز دا ادەمى پەيزاجدارى ەرەكشە كوركەم بولا تۇسەدى. بۇل ۋاقىتتا ەسكى قاماۋلاردىڭ قيراعان ۇيىندىلەرى اراسىندا سەرۋەندەپ، توعاي ىشىندەگى سوقپاقپەن جۇرۋگە ەڭ قولايلى اۋا- رايى بولادى، سەبەبى اۋاسى جىلى ءارى قۇرعاق. نەگىزىندە ترانسيلۆانيانىڭ داڭقىن الەمگە تانىتقان گراف دراكۋلا تۋرالى اڭىز بولاتىن. گراف دراكۋلانىڭ بەينەسى XV عاسىر ورتاسىندا ءومىر سۇرگەن رۋمىنيالىق كنياز ۆلاد سەپەشكە نەگىزدىلگەن. حەللوۋين مەيرامى قارساڭىندا ۆامپيرلەر تۋرالى جانە باسقا دا اڭىز- اڭگىمەلەرگە قىزىققان الەم تۋريستەرى مەن جەرگىلىكتى تۇرعىندار وسىندا كوپتەپ جينالادى.
شينجياڭ پروۆينسياسى، قىتاي ( قاناس كولى)
جىل مەزگىلىنە بايلانىستى ءتۇسىن وزگەرتىپ وتىراتىن التايدىڭ قىتايلىق جاعىندا ورنالاسقان كاناس كولى - تاعى ءبىر تىلسىم جەر. سونىمەن قاتار بۇل كول ءتۇسىن اۋا تەمپەراتۋراسىنا جانە تاۋلىك ۋاقىتىنا بايلانىستى وزگەرتىپ وتىرادى. مامىر ايىندا كوگىلدىر بولسا، قازان ايىندا ءزۇبارجات تۇسكە اينالادى. كول جاعاسى بويىندا قىتايدىڭ ەڭ اسەم ەسكى زامانعى تۋۆين اۋىلدارى ورنالاسقان. جاعالاۋداعى ۇيلەرگە كەلىپ قوناتىن تۋريستەر بىرەگەي وقيعالاردىڭ ءجيى كۋاسى بولىپ جاتادى، سيرەك كەزدەسەتىن قۇبىلىستار بايقالىپ تۇرادى. جەرگىلىكتى تۇرعىنداردىڭ اڭىزدارى بويىنشا كولدە بەيتانىس قۇبىجىقتار تىرشىلىك ەتەدى.
بوستون، امەريكا
امەريكاندىقتار بوستوندى كۇز استاناسى دەپ اتايدى. بۇل بەكەردەن- بەكەر ەمەس. كۇن ءالى ىزعارىن جوعالتپاي جاتقاندا كىرپىشتەن سالىنعان عيماراتتاردى عاجاپ تۇسكە بويايدى، جاپىراقتار بالدىڭ نە تاڭقۋرايدىڭ تۇسىنە بولەنەدى. بوستونعا «بارلىق قاسيتەتتىلەر كۇنىنە» وراي بارعان جاقسى. حەللوۋين - جەرگىلىكتى حالىق ءۇشىن ەرەكشە مەيرام. ءداستۇر بويىنشا قالا تۇرعىندارى مەرەكەلىك شەرۋگە قاتىسادى: جۇزدەگەن ادام جالماۋىز، سيقىرشى، ۆامپير، قۇبىلعىش جىن كوستيۋمدەرىن كيىپ، باسقا سيقىرلى كەيىپكەرلەر بەينەسىندە تۇڭگى بەزەندىرىلگەن قالا كوشەلەرىنە شىعادى.
buro247.kz
