مىرزاعالي ايتجانوۆ: جوسپارىمىز - 5 مەدال، ونىڭ ەكەۋى - التىن
بۇل تۋرالى بۇگىن ۇلتتىق قۇرامانىڭ باس باپكەرى مىرزاعالي ايتجانوۆ قازاقپارات تىلشىسىنە تەلەفون ارقىلى بەرگەن شاعىن سۇحباتىندا ءمالىم ەتتى. «ءبىز ءقازىر الماتىدا الاتاۋ بوكتەرىندە جاتىپ، جاتتىعۋ جاساپ جاتىرمىز. تاۋ بوكتەرىندە اۋا تازا، جۇگىرۋگە دە، تاس لاقتىرۋعا دا، شىڭدارعا ورمەلەپ جارىسۋعا دا بارلىق جاعىنان وتە قولايلى» ، - دەيدى باس باپكەر.
- ءوز شاكىرتتەرىڭىزدىڭ جاتتىعۋىنا كوڭىلىڭىز تولا ما؟
- ارينە، جىگىتتەرىمىز ريوعا ساقاداي ساي. وسىعان دەيىن ءوزىمىز جاساعان جوسپار بويىنشا جاتتىعۋدىڭ بىرنەشە ساتىسىن اياقتادىق. قازىر جىگىتتەرىمىز كۇش جيناپ جاتىر. الدا تاعى دا بىرنەشە وقۋ- جاتتىعۋ جيىندارىمىز بار. اللا قالاسا، شىلدەنىڭ 17 سىنەن باستاپ استانادا جاتتىعۋىمىزدى جالعاستىراتىن بولامىز.
- بۇيىرتسا، قانشا مەدال الۋدى جوسپارلاپ وتىرسىزدار؟
- قازاقتا «ارىق ايتىپ، سەمىز شىعايىق» دەگەن اتالى ءسوز بار. مەندە سول ۇستانىمدى قاتتى ۇستاناتىن جىگىتتەردىڭ ءبىرىمىن. جالپى 5 مەدال الامىز دەگەن جوسپارىمىز بار. ونىڭ ىشىندە 2 التىن الۋ باستى ماقساتىمىز. ال بىزدە جالپى 5 مەدالدان ارتىك الۋعا مۇمكىندىگىمىز بار.
- ءوزىڭىز باپكەر رەتىندە كىمدەرگە باسا ءۇمىت ارتاسىز؟
- مەنىڭ قولاستىمداعى جاتتىعىپ جاتقان بوكسشىلاردىڭ بارلىعى ءوز بالام سياقتى. ءارقايسىسىن ءار ءتۇرلى جەردە جەكە- جەكە جاتتىقتىرىپ جۇرگەن جوقپىن. بارلىعى بىرگە جاتتىعادى. اناۋ مىقتى، مىناۋ وسال دەپ بولە جارىپ كورگەن ەمەسپىن. بارلىعى دا مەدالدان ءۇمىتتى. الايدا، ءارقايسىسىنىڭ وزدەرىنىڭ باعىنا بايلانىستى.
- اڭگىمەڭىزگە راحمەت! ماقساتتارىڭىزعا جەتۋلەرىڭىزگە تىلەكتەسپىز.. .
اۆتور: كۇنسۇلتان وتارباي