جامبىل وبلىسىندا سيريادان كەلگەن 5 بوسقىن تىركەلگەن

استانا. قازاقپارات - جامبىل وبلىسىندا بۇگىنگى كۇنگە دەيىن 6 بوسقىن تىركەلگەن.

ولاردىڭ 5 ى سيريادان كەلسە، بىرەۋى تۇركىمەنستان ەلىنىڭ ازاماتى.

سيريالىقتار ءبىر وتباسىنىڭ مۇشەلەرى. ولار ءبىزدىڭ ەلگە باس ساۋعالاپ، بەيبىت ءومىر ىزدەپ كەلگەن جاندار. قازىر بوسقىن مارتەبەسى بەرىلىپ، جۇمىس ىستەپ ءجۇر. المۋحاماد سۆەيد ايەش حاسان ۇلى قازاقستانعا 2013 -جىلى وتباسىمەن قونىس اۋدارعان. بۇل ونىڭ العاش كەلۋى ەمەس. 1991 -جىلى وقۋعا كەلىپ، اسفەندياروۆ اتىنداعى ينستيتۋتقا «ەمدەۋ ءىسى» فاكۋلتەتىنە تۇسكەن. ايەلى قازاقستان ازاماتشاسى. ولار وسى جەردە تانىسىپ، 1996 -جىلى ۇيلەنگەن. ال وقۋدى ءتامامداعاننان كەيىن جۇبايى ەكەۋى سيرياعا ورالادى. ءبىراق ەلدە كوپ ۇزاماي سوعىس باستالىپ، وتانىن تاستاپ باس ساۋعالاۋعا ءماجبۇر بولعان.

ايەش سۆەيد، سيريا ازاماتى:

- بارلىعى بەيبىت ميتينگ، بەيبىت شەرۋدەن باستالدى. ول بىرتە-بىرتە سوعىسقا اينالدى. كوپ ۇزاماي سوعىس ءبىز تۇرىپ جاتقان قالاعا دا جەتتى. ماڭايدا ءتۇرلى قاقتىعىستار بولىپ، بومبالار جارىلا باستادى. وسىلايشا، 2 جىل بويى قاشىپ ءومىر سۇردىك. ول جاقتا قازىر ءومىر ءسۇرۋ مۇمكىن ەمەس. سوندىقتان قازاقستانعا كەلۋدى ءجون كوردىك. ايەش سۆەيدتىڭ 1 قىز 3 ۇلى بار. ولار ەندى-ەندى ەسىن جيىپ، قاۋىپتىڭ ارتتا قالعانىن سەزىنىپ ءجۇر.

حاسان سۆەيد، ايەش سۆەيدتىڭ ۇلى:

- ول جاقتا وتە قورقىنىشتى. بارلىق جەردە اسكەري ءىس-قيمىلدار. قاپتاعان تانكتەر مەن ۇشاقتار. جارىلىس كوپ بولادى. جازىقسىز ادامداردىڭ مەرت بولعانىن كوزبەن كوردىك. ءبىز سياقتى قانشاما بالا زارداپ شەكتى. قورقىنىشتى.

قازىر سيريالىق بوسقىن مارتەبەسىن العان. ۇلكەن ۇلى حاسان جاقىندا 16 جاسقا تولىپ، ءبىزدىڭ ەلدىڭ ءتول قۇجاتىن الدى. ال قالعان ءۇش بالاسىنا جەكە سايكەستەندىرۋ ءنومىرى بەرىلگەن. بۇگىندە ايەش ەكى جەردە دارىگەر بولىپ جۇمىس ىستەيدى. بيىل ول مەديتسينا قىزمەتكەرلەرىنىڭ كاسىبي مەرەكەسىن ۇجىمداستارىمەن ەكىنشى رەت اتاپ وتپەك.

ەلەنا پوتاپوۆا، ايەش سۆەيدتىڭ جۇبايى:

- باسىندا كەلگەندە قيىن بولدى، ارينە. تۇرعىلىقتى مەكەنجايعا تىركەلۋ، اسىرەسە جولداسىما بوسقىن مارتەبەسىن الاتىن كەزدە قينالدىق. قۇجاتتى الۋعا «نۇر وتان» پارتياسى كوپ كومەك بەردى. العىسىمىز شەكسىز. وسىدان كەيىن بارىپ جۇمىسقا ورنالاسۋ مۇمكىن بولدى. قازىر قۇدايعا شۇكىر، جاعدايىمىز جامان ەمەس. بالا- شاعامىز مەكتەپتە ءبىلىم الىپ جاتىر.

بوسقىن مارتەبەسىن العان شەتەلدىك ازاماتتاردىڭ بارلىعى بەيبىت ءومىر ىزدەپ كەلگەن. بار تىلەك: «ءبىزدىڭ كورگەنىمىزدى ەشكىمنىڭ باسىنا بەرمەسىن. سوعىسسىز، اشىق اسپان استىندا تىنىش ءومىر سۇرگەنگە جەتەر ەشتەڭە جوق.»، - دەيدى ولار.

گۇلسارا مۇحتارقۇلوۆا، وبلىستىق ءى ءى د باسپا ءسوز حاتشىسى:

- وسى كۇنگە دەيىن جامبىل وبلىسىنا 6 بوسقىن كەلدى. ولار سيريا مەن تۇركىمەنستان ازاماتتارى. سيريا ازاماتتارى ءبىر وتباسى بولىپ تابىلادى. سيرياداعى ازاماتتىق سوعىسقا بايلانىستى 2014 -جىلى بوسقىن مارتەبەسىن الۋ تۋرالى ءوتىنىش بەرگەن. ءوتىنىشى 2009 -جىلى قابىلدانعان №216 زاڭعا سايكەس قارالدى. قازىر ايەش سۆەيد وتباسىمەن پاتەر جالداپ تۇرىپ جاتىر. زاڭ بويىنشا ول قۇجات مەرزىمىن جىل سايىن ۇزارتىپ وتىرۋى ءتيىس. بۇل سيريالىق پاسپورتىمەن راسىمدەلەتىن كورىنەدى. «كەلەر جىلى ونىڭ دا مەرزىمى اياقتالسا، جاعدايىم نە بولادى» دەپ الاڭدايدى سيريالىق بوسقىن.

www.24.kz