الەمدەگى ەڭ ۇزاق 5 فيلم

استانا. قازاقپارات - كينو كەيدە قىزىقتى، كەيدە ويلى، ال كەيدە وتە ۇزاق بولادى. بۇگىنگى ماتەريالدا الەمدەگى ەڭ ۇزاق فيلمدەردى ۇسىنامىز.

5. «الەمدەگى ەڭ ۇزاق جانە ماعىناسىز فيلم»

«The Longest Most Meaningless Movie in the World» (الەمدەگى ەڭ ۇزاق جانە ماعىناسىز فيلم) - اعىلشىن فيلمنىڭ تارتىمسىز اتاۋى سول ساتتە، ياعني 1968-جىلى اتىنا زاتى ساي بولدى. سەبەبى ودان كەيىنگى شىققان كينەماتوگرافيا تۋىندىلارى «الەمدەگى ەڭ ۇزاق جانە ماعىناسىز فيلم» رەكوردىن باسىپ ءتۇستى.

فيلم ءۇشىن ارنايى ءتۇسىرىلىم بولماعان. كينوتاسپانىڭ سيۋجەتى جوق، ول جارنامالىق روليكتەردەن جانە ءالى پروكاتقا شىقپاعان باسقا فيلمدەردىڭ ۇزىندىلەرىنەن قۇرالعان. كەي جەرلەرىندە ءبىر روليك بىرنەشە رەت قايتالانىپ، ال كەيدە سۋرەت كەرىسىنشە اينالىپ كەتەدى نەمەسە ارەكەت ارتتان العا قاراي قوزعالادى. ەگەر «كوركەمونەر» سىنىن كوتەرەمىن دەپ شەشسەڭىز، 48 ساعات بوس ۋاقىتىڭىزدى دايىنداپ قويىڭىز.

4. «ۇيقىسىزدىق ءدارىسى»

بۇل فيلمنىڭ دە سيۋجەتى جوق. فيلم ءۇش جارىم تاۋلىككە سوزىلعان. فيلمنىڭ باسىنان اياعىنا دەيىن اكتەر لي گروبان كورەرمەندەرگە ءوزىنىڭ 48-بەتتىك «ۇيقىسىزدىق ءدارىسى» اتتى پوەماسىن وقىپ بەرەدى. ۇيقىسىزدىقتان ارىلتاتىن تەراپيادان كورەرمەن مىندەتتى تۇردە ۇيىقتاپ قالار ەدى. الايدا فيلمنىڭ اراسىندا حيەۆي مەتال (روك مۋزىكا سالاسى) جانرىنداعى ۆيدەوبەينەلەر وينالادى. تاسپانى 1987-جىلى رەجيسسەر گەنري تيمميسوم تۇسىرگەن.

3. «ماترەشكا»

2006-جىلى تۇسىرىلگەن دەرەكتى نەمىس فيلمىنىڭ رەجيسسەرى - كارين حەرلەر. «ماترەشكا» فيلمىنىڭ دىبىسى جوق. بۇل فيلمدە سۋرەتتەر كەزەكپەن اينالىپ تۇرادى. ول جەردە ۆەلوسيپەد تەۋىپ جۇرگەن بالا، كوشەلەر، ۇيلەر، كولىكجاي جانە اسپان كورسەتىلگەن. فيلم 95 ساعاتقا سوزىلادى.

2. «سينەماتون»

فرانسۋز رەجيسسەرى جەرار كۋرانتتىڭ 192 ساعاتتىق فيلمى شامامەن 35 جىل (1978-جىلدان 2015-جىلعا دەيىن) تۇسىرىلگەن. ول اتاقتىلار (سۋرەتشىلەر، اقىندار، جۋرناليستتەر، رەجيسسەردىڭ دوستارى جانە ت. ب.) بەينەلەنگەن، دىبىسسىز 2880 ويۋ سۋرەتتەن (ۆينەتكا) قۇرالعان. اركىم وزىنە بولىنگەن ۋاقىتتا كادرعا نە ىستەسە دە ءوزى بىلەدى.

1. Modern Times Forever (ماڭگىلىك وسى شاق)

بۇل فيلم 240 ساعات جۇرەدى. ول قازىر الەم بويىنشا ەڭ ۇزاق فيلمدەردىڭ تىزىمىندە ءبىرىنشى ورىندى يەلەندى. 2011-جىلى Superflex دات ارت-توبى تۇسىرگەن. باسقالارى سەكىلدى بۇل فيلمدە دە سيۋجەت بولماعانمەن، قانداي دا ءبىر ماعىنانى تۇسىنۋگە بولادى. تاسپا فين-شۆەدتىك ورمان وندىرىستىك كومپانياسىنىڭ شتاب-پاتەرىن كورسەتەدى. سونىڭ جارتىلاي بۇزىلعانعا دەيىنگى جاعدايىن جانە ۋاقىت وتە ادامزاتتىڭ جوعالۋىن كورسەتەدى.

massaget.kz