قازاقستاندا ەڭ كوپ ساتىلاتىن 5 كولىك - فوتو
اقشاسى بارلاردىڭ ءوزى دە ارزان كولىكتەرگە ۇمتىلۋدا.
Kolesa.kz سايتىنداعى مالىمەتتەرگە سۇيەنە وتىرىپ، «قامشى» پورتالى نازارلارىڭىزعا 2016-جىلدىڭ العاشقى ايىندا ەڭ كوپ ساتىلعان، باعاسى ارزان بەس كولىك ماركاسىن ۇسىنادى.
تىزىمگە ەنگەن بەس ماركانىڭ بارلىعى دا ت م د ەلدەرىندە قۇراستىرىلاتىن كولىكتەر. ونىڭ ىشىندە، بىرەۋى قازاقستان مەن وزبەكستان ماركاسى بولسا، قالعان ۇشەۋى رەسەيلىك كولىكتەر.
قازاقستانداعى ەڭ ارزان كولىكتەر ءتىزىمىن وزبەكتەر قۇراستىرعان Matiz باستاپ تۇر. اۆتوسالوندار بۇل كولىك ءۇشىن 1559000 تەڭگە سۇراپ وتىر. جارتى جىل بۇرىن 1059000 تەڭگەگە ساتىلعان كولىكتىڭ باعاسى بيىل ءبىرشاما قىمباتتاعان.
بيۋدجەتتىك كولىك 51 اتتىڭ كۇشىنە يە 0.8 ليترلىك قوزعالتقىشپەن، مەحانيكالىق 5 ساتىلى بەرىلىس قورابىمەن جابدىقتالعان. مۇندا ءرۋلدىڭ گيدرو كۇشەيتكىشى، ورتالىق قۇلىپ دەگەن جۇيەلەر مۇلدە ورناتىلماعان.
وسى رەتتە بۇل ماركالى كولىكتەردىڭ ەۋرازيالىق ەكونوميكالىق وداقتىڭ تەحنيكالىق رەگلامەنتىنە ساي قازاقستانعا اكەلىپ ساتىلۋىنا تىيىم سالىنعانىن، سالوندارعا بۇرىن اكەلىنگەن كولىكتەر تاۋسىلعان سوڭ اۆتوموبيل ساتىلىمنان شىعارىلاتىنىن ەسكەرتە كەتۋ كەرەك.
بۇگىندە سالوندار بۇل كولىك ماركاسىن 1559000-2329000 تەڭگە ارالىعىندا ساۋدالاۋدا.
وتىمدىلىگى جاعىنان رەسەيلىك LADA Granta دا قالىسپايدى. باعاسىنىڭ ارزاندىعىنا بايلانىستى بۇل ماركا قازاقستان كولىك نارىعىنداعى ەڭ تانىمال كولىكتەردىڭ ءبىرى بولىپ وتىر. بۇل ماركا تانىمالدىعى جاعىنان تەك Hyundai Accent كولىگىنە عانا جول بەرەدى ەكەن.
كولىكتىڭ ەڭ قاراپايىم جيناعىن (كومپلەكتاتسيا) 1669000 تەڭگەگە ساتىپ الۋعا بولادى. Lada-نىڭ بۇل ماركاسىنداعى 1.6 كولەمدى قوزعالتقىشى 82 اتتىڭ كۇشىنە يە، 5 ساتىلى مەحانيكالىق بەرىلىس قورابى بار. قولايلىلىق جاعىنان «ماتيزدەن» اسىپ تۇسپەيدى. ءبىراق، ارتىقشىلىعى رەتىندە جالعىز قاۋىپسىزدىك «جاستىعى» بارىن ايتا كەتۋ كەرەك.
LADA Granta- نىڭ ەڭ ارزان جيناعى 1669000 تەڭگە تۇرسا، ەڭ قىمبات جيناعى 2392000 تەڭگەدەن ساتىلۋدا.
ارزان كولىكتەر ءتىزىمىن قازاقستاندا قۇراستىرىلعان قىتايلىق ماركا جالعاستىرادى. Geely CK كولىگىن رەسمي ديللەرلەر 1930000 تەڭگەگە باعالاپ وتىر. سەدان 1.3 كولەمدى 85 اتتىڭ كۇشىنە يە قوزعالتقىشپەن جانە مەحانيكالىق بەرىلىس قورابىمەن جابدىقتالعان.
ەڭ ارزان جيناعى مەن قىمبات ءتۇرىنىڭ ايىرماشىلىعى - كونديتسيونەر مەن ABS جۇيەسى عانا. ياعني، ەكى ءتۇرلى جيناق قاڭتار ايىندا سايكەسىنشە 1930000 جانە 2250000 تەڭگەدەن ساۋدالانعان.
ءتورتىنشى ورىن بۇل تىزىمدە رەسەيلىك LADA Kalina- عا تيەسىلى. بۇل كولىكتىڭ «ستاندارت» ۇلگىسىندەگى بازالىق جيناعى 2013000 تەڭگەدەن ساتىلعان. جابدىقتالۋى جاعىنان LADA Granta-دان ەش ايىرماشىلىعى جوق.
ءتۇرلى ۇلگىدەگى جيناقتارىنىڭ باعاسى 2013000 مەن 2748000 تەڭگە ارالىعىن قۇرايدى.
قالتاعا جەڭىل كولىكتەر رەيتينگىن تاعى دا رەسەيلىك LADA Priora تۇيىقتايدى. جاستار اراسىندا ۇلكەن قىزىعۋشىلىققا يە بۇل كولىك 16 كلاپاندى 106 اتتىڭ كۇشىنە يە 1.6 كولەمدى قوزعالتقىشپەن، مەحانيكالىق بەرىلىس قورابىمەن جابدىقتالعان.
سونداي-اق، قاۋىپسىزدىك «جاستىعى»، ABS جۇيەسى، ورتالىق قۇلىبى، بورتكومپيۋتەرى جانە الدىڭعى تەرەزەلەردى ەلەكتر كوتەرگىش جۇيەسى بار. «پريورانىڭ» بازالىق ۇلگىسى 2038000 تەڭگەدەن، ال، ەڭ قىمبات ۇلگىسى 2493000 تەڭگەدەن ساتىلعان.
