15:17, 17 - قىركۇيەك 2015 | GMT +6
قىتاي كلۋبى «استانا» باپكەرىنە 5 ميلليون دوللاردىڭ كەلىسىمشارتىن ۇسىندى
استانا. قازاقپارات - «استانانىڭ» باس باپكەرى ستانيمير ستويلوۆ مانسابىن قىتايلىق «بەيتسزين گوان» كلۋبىندا جالعاستىرۋى مۇمكىن، - دەپ حابارلايدى Vesti.kz بولگاريالىق اقپارات قۇرالدارىنا سىلتەمە جاساپ.
حابارلامادا قىتايلىق كلۋب وكىلدەرىنىڭ ستويلوۆقا رەسمي تۇردە ۇسىنىس جاساعانى ايتىلعان. «بەيتسزين گوان»(بەيجيڭ گوان) بولگاريالىق مامانمەن جىلىنا 5 ميلليون دوللار تولەنەتىن كەلىسىمشارت جاساسۋعا دايىن.
ايتا كەتەيىك، «استانا» باس باپكەرىنىڭ كەلىسىمشارتىندا كورسەتىلگەن مەرزىم وسى جىلدىڭ سوڭىندا اياقتالادى.
48 جاستاعى ستانيمير ستويلوۆ 2014 -جىلدىڭ جاز مەزگىلىنەن باستاپ «استانا» كلۋبىن باسقارىپ كەلەدى. ونىڭ باسشىلىق ەتۋىمەن بۇل كوماندا قازاقستان چەمپيونى اتاندى، سۋپەركۋبوكتە جەڭدى جانە چەمپيوندار ليگاسىنىڭ توپتىڭ كەزەڭىنە ءوتتى. بولگاريالىق ب ا ق- تىڭ مالىمەتىنشە، كەلىسىمشارت بويىنشا ستويلوۆ ميلليون دوللار الادى. ءبىراق وتاندىق اقپارات قۇرالدارىندا ول جىلىنا 400000 دوللار تابىس تابادى دەگەن مالىمەت بار.