دۇنيەءجۇزى بويىنشا ءاربىر 5- ايەل بەدەۋلىك دەرتىنە ۇشىرايدى - سالتانات بايقوشقاروۆا
بۇل تۋرالى و ك ق بريفينگىندە ق ر پرەزيدەنتى جانىنداعى ايەلدەر ءىسى جانە وتباسى- دەموگرافيالىق ساياسات جونىندەگى ۇلتتىق كوميسسيانىڭ مۇشەسى، ادام ۇرپاعىن ءوربىتۋ ورتالىعىنىڭ ديرەكتورى سالتانات بايقوشقاروۆا ايتىپ بەردى.
«بەدەۋلىك ماسەلەسى ارينە، دۇنيەءجۇزى بويىنشا دا، ءبىزدىڭ ەلىمىزدە دە وزەكتى ماسەلە. ونىڭ ۇستىنە، جىلدان جىلعا ازايىپ تا جاتقان جوق. ويتكەنى وعان بارلىق فاكتورلار - پسيحوولوگيالىق فاكتورلار دا، ەكولوگيالىق فاكتورلار دا سەبەپ. جانە دە قازىر مەن ايتىپ جۇرگەن الەۋمەتتىك بەدەۋلىك ماسەلەسىن دە ۇمىت قالدىرماۋىمىز كەرەك. ياعني، انا بولۋ، اكە اتانۋ باقىتىن كەيىنگە شەگەرىپ قوياتىن وتباسىلار بار»، - دەيدى س. بايقوشقاروۆا.
بىلىكتى ماماننىڭ ايتۋىنشا، بالا ءسۇيۋ ءۇشىن ونىڭ ورتالىعىنا كەلەتىن ايەلدەردىڭ 70 پايىزىنان استامى كەزىندە تۇسىك جاساتقان ايەلدەر بولىپ شىعادى ەكەن.
«دۇنيەجۇزىلىك ستاتيستيكاعا سۇيەنسەك، ءاربىر بەسىنشى-التىنشى وتباسى بەدەۋلىك ماسەلەسىنە تاپ بولادى. ءبىراق، ولاردىڭ اراسىندا ءبىر پەرزەنتكە زار بولىپ جۇرگەن وتباسىلارمەن قاتار، 2-3 بالاسى بار، ءبىراق، كەلەسى بالاسىن كوتەرە الماي جۇرگەن انالار بار. بەدەۋلىكپەن كۇرەسۋ تەك دارىگەرلەردىڭ باس اۋىرتاتىن ماسەلەسى ەمەس.
تاعى ايتا كەتەرلىگى، بىزدە بەدەۋ ايەلدەردىڭ 50 پايىزى دەنساۋلىعىنا نەمقۇرايلى قاراعان ايەلدەر جانە بىزگە ەمدەلۋگە كەلەتىن ايەلدەردىڭ 70-80 پايىزى كەزىندە جاساندى تۇسىك جاساتقان كەلىنشەكتەر. سوندىقتان، قىزدارىمىزدىڭ قۇلاعىنا التىن سىرعا، جاستايلارىڭىزدان بولاشاقتا ۇلاعاتتى انا بولسام دەپ ارمانداڭىزدار. سوندا عانا بەدەۋلىك ماسەلە ازايار»، - دەگەن ءۇمىتىن جەتكىزدى دارىگەر.
اۆتور: كەنجەكەي توقتامۇرات قىزى