قىتاي بانكى «بايتەرەك» حولدينگىنە 5 ميلليارد دوللار بولۋگە دايىن
ءتيىستى قۇجاتقا بۇگىن ق ر پرەزيدەنتى نۇرسۇلتان نازاربايەۆتىڭ ق ح ر- عا مەملەكەتتىك ساپارى اياسىندا «بايتەرەك» حولدينگى باسقارماسىنىڭ ءتوراعاسى قۋاندىق بيشىمبايەۆ پەن Bank of China باسقارماسىنىڭ ءتوراعاسى تيان گولي قول قويدى.
«بۇل ۋاعدالاستىقتىڭ بارلىعى دا شىنايى. ولار وتە ناقتى تاجىريبەلىك سيپاتقا يە جانە 45 جوبا بويىنشا ۇلكەن باعدارلامانى جۇزەگە اسىرۋعا باعىتتالعان. قازىرگى ۋاقىتتا ولار قازاقستاندىق جانە قىتايلىق ونەركاسىپتىك- ينۆەستيتسيالىق كومپانيالارمەن بىرلەسە زەردەلەنۋدە»، - دەدى ق. بيشىمبايەۆ قازاقستاندىق جۋرناليستەرگە.
ونىڭ اتاپ وتۋىنشە، اتالعان قارجى قاراجاتتارى تىكەلەي ينۆەستيتسيا تۇرىندە، ياعني كومپانيانىڭ جارعىلىق كاپيتالى رەتىندە تۇسەدى، سونىمەن بىرگە نەسيە تۇرىندە دە بولىنەدى.
«تولىقتاي العاندا، ءبىز بۇگىنگى كۇنى نارىقتا ورىن الىپ وتىرعان پايىزدىق ستاۆكا ءبىرشاما بولاتىندىعىن قاراستىرۋدامىز. ويتكەنى، يندۋستريالىق جوبالار وتەلىمدىگى بويىنشا بارىنشا ۇزاقمەرزىمدى سانالادى. سوندىقتان ءبىز جانە قىتاي تارابى اتالعان رەسۋرستاردىڭ قولجەتىمدىلىگى پايىزدىق ستاۆكالارىنىڭ تومەندىگى ەسەبىنەن قامتاماسىز ەتىلۋى تيىستىگىن تۇسىنەمىز»، - دەدى ول.
ەستەرىڭىزگە سالا كەتەيىك، «بايتەرەك» ۇلتتىق باسقارۋشى حولدينگى قازاقستان رەسپۋبليكاسى پرەزيدەنتىنىڭ 2013 - جىلعى 22 - مامىرداعى جارلىعىمەن قۇرىلعان. حولدينگتى قۇرۋداعى ماقسات ەكونوميكانى دامىتۋ جانە ءارتاراپتاندىرۋعا جاردەمدەسۋ، ينۆەستيتسيا تارتۋ.
حولدينگتىڭ قۇرامىنا: «قازاقستاننىڭ دامۋ بانكى» ا ق، «قازاقستاننىڭ ينۆەستيتسيالىق قورى» ا ق، «قازاقستاننىڭ تۇرعىن ءۇي قۇرىلىس جيناق بانكى» ا ق، «قازاقستاننىڭ يپوتەكالىق كومپانياسى» ا ق، «قاز ەكسپورت گارانت» ا ق، «دامۋ» كاسىپكەرلىكتى دامىتۋ قورى» ا ق، «تەحنولوگيالىق دامۋ جونىندەگى ۇلتتىق اگەنتتىك» ا ق، «يپوتەكالىق نەسيەلەردى كەپىلدەندىرۋدىڭ قازاقستاندىق قورى» ا ق، «قازىنا كاپيتال مەنەدجمەنتى» ا ق، «بايتەرەك ديەۆەلوپمەنت» ا ق، «مەملەكەتتىك- جەكە مەنشىك ارىپتەستىك جوبالارىن قولداۋ ورتالىعى» ج ش س كىرەدى. حولدينگ وسى كومپانيالاردىڭ مەملەكەتتىك اكسيالار توپتاماسىن يەلەنۋگە جانە پايدالانۋعا قۇقىلى.
Bank of China (قىتاي بانكى) كوممەرتسيالىق بانك، قىتايدىڭ ءىرى بەس جانە الەمنىڭ ۇزدىك بانك مەكەمەلەرىنىڭ جيىرمالىعىنا كىرەدى. ق ح ر- دا 13 مىڭنان استام بولىمشەسى جانە الەمنىڭ 25 مەملەكەتىندە 550 وكىلدىگى بار.
ن. نازاربايەۆتىڭ قىتايعا مەملەكەتتىك ساپارى 3 - قىركۇيەككە دەيىن جالعاسادى. بەيسەنبى كۇنى ەلباسى قىتاي حالقىنىڭ جاپون باسقىنشىلارىنا قارسى سوعىستاعى جەڭىسىنىڭ 70 جىلدىعىنا ارنالعان سالتاناتتى پارادقا قاتىسادى.
