بالاپان تەلەارناسىنىڭ 5 جىلدىعىنا وراي ويىن- ساۋىق شارالارى ۇيىمداستىرىلادى
تەلەارنانى قۇرۋ يدەياسى پرەزيدەنت نۇرسۇلتان نازاربايەۆتىڭ باستاماسى بولاتىن.
حابار تاراتۋ قازاق تىلىندە جۇرگىزىلەدى. تەلەارنا «قازاقستان» رەسپۋبليكالىق تەلەراديوكورپوراتسياسىنىڭ (ر ت ر ك) قۇرامىنا كىرەدى، دەپ حابارلايدى «قازاقستان» ر ت ر ك باسپا ءسوز قىزمەتىنەن.
ارنانىڭ تۋعان كۇنىنە وراي كورەرمەندەر اراسىندا بايقاۋ جاريالاندى. ونىڭ شارتتارى بويىنشا قازاقستاندىق اتا- انالار 25 -تامىزعا دەيىن ءوز ويلارىنان قۇراستىرعان ەرتەگىلەرىن تەلەارناعا جولداۋلارىنا بولادى. ەڭ ۇزدىك ەرتەگى جەلىسى بويىنشا تەلەۆيزيالىق قويىلىم ءتۇسىرىلىپ، كىتاپ شىعارىلادى.
ارنانىڭ تۋعان كۇنىنە وراي كىشكەنتاي كورەرمەندەرگە ارنالىپ 22 -قىركۇيەكتە «قازمەديا ورتالىعىنىڭ» ۇلكەن زالىندا ديسنەي ۇسىنعان «اقشاقار» مۋلتفيلمىنىڭ تۇساۋكەسەرى وتكىزىلەدى.
ال 24 -قىركۇيەكتە «قازمەديا ورتالىعىنىڭ» حوللىندا بالدىرعاندارعا ارنالىپ مەرەكەلىك شارالار مەن كورمەلەر ۇيىمداستىرىلىپ وتكىزىلەدى. قوناقتاردى سان ءتۇرلى قىزىقتى ويىن- ساۋىق باعدارلامالار كۇتۋدە.
«بالاپان» بالالار تانىمدىق ويىن- ساۋىق تەلەارناسىنىڭ ماقساتى - ءوسىپ كەلە جاتقان جاس بۋىننىڭ ۇلتتىق جانە مادەني تۇلعاسىن قالىپتاستىرۋ، وتانعا دەگەن سۇيىسپەنشىلىك پەن ۇلكەندەردى سىيلاۋعا، «ينتەللەكت» يەسى، ءبىلىم مەن عىلىمنىڭ شىڭىنا شىعار ازامات بولىپ ەر جەتۋىنە ىقپال جاساۋ جانە دەنى ساۋ، رۋحاني ويلاۋ دارەجەسى بيىك، مادەنيەتتى، پاراساتتى، ار- وجدانى مول، ەڭبەكسۇيگىش، ىسكەر، بويىندا باسقا دا يگى قاسيەتتەر قالىپتاسقان ۇرپاق تاربيەلەۋ بولىپ تابىلادى.
«بالاپان» تەلەارناسى العاشىندا 12 ساعات حابار تاراتسا، بۇگىندە 14 ساعات بويى ەفيرگە شىعادى. ونىڭ باعدارلامالارى ءۇش جاستان ون جاسقا دەيىنگى جاسوسپىرىمدەرگە ارنالعانىمەن، ەرەسەك اۋديتوريانىڭ دا ىقىلاسىنا بولەنىپ ۇلگەردى.
شەتەلدىك كونتەنتتىڭ سانىن ازايتۋدىڭ ارقاسىندا مەنشىكتى قۇرامدى ۇلعايتۋ مۇمكىن بولىپ وتىر. بۇگىنگى تاڭدا مەنشىكتى ءوندىرىس سانى 30 پايىزدان 80 گە دەيىن كوبەيىپ وتىر.
ەستەرىڭىزگە سالا كەتەيىك، «بالاپان» بالالار تەلەارناسى 6 -شىلدەدەن باستاپ 70 مىڭ حالقى بار بايقوڭىر قالاسىندا دا حابار تاراتا باستادى.
«بالاپان» كورەرمەندەرگە «وتاۋ ت ۆ» ۇلتتىق جەرسەرىكتىك تەلەۆيزيا جەلىسى، 78 كابەلدىك وپەراتورلار مەن 2 ەفيرلىك حابار تاراتۋشىلار ارقىلى جەتكىزىلەدى.
