اتىراۋ وبلىسىندا «ەمبى مۇناي گاز» ا ق ەكى جىلدا مۇناي قورىن 5 ميلليون تونناعا ۇلعايتۋدى جوسپارلاۋدا

اتىراۋ. قازاقپارات - اتىراۋ وبلىسىنداعى ءبىرقاتار كەن ورىندارىندا وڭدەۋ جۇمىستارىن جۇرگىزىپ جۇرگەن «ەمبى مۇناي گاز» ا ق مۇنايشىلارى 2015 - جىلى 150 شارشى شاقىرىم جەرگە سەيسمو بارلاۋ جۇمىستارىن جۇرگىزۋدى جوسپارلاپ وتىر.

«بۇل جۇمىستارعا اعىمداعى جىلى 659 ميلليون تەڭگە جۇمسالادى. ال 2016 - جىلى سەيسمو بارلاۋ جۇمىستارىنىڭ كولەمى ارتىپ، 500 شاقىرىم دەڭگەيگە جەتەدى»، - دەدى قازاقپارات تىلشىسىنە «ەمبى مۇنايگاز» ا ق باس ديرەكتورى قۇرمانعازى ەسقازيەۆ.

 الەمدىك نارىقتا مۇناي باعاسىنىڭ اۋىتقىپ تۇرعانىنا قاراماستان، «ەمبى مۇناي گاز» ا ق ىزدەۋ- بارلاۋ جۇمىستارىن جۇرگىزىپ جاتىر. بيىلعى جىلى تەرەڭدىگى  10700 مەتر بولاتىن 5 ۇڭعىما بۇرعىلانادى. بۇعان 3 998,5 ميلليون تەڭگە ءبولىندى. 2016 - جىلى بارلاۋ- بۇرعىلاۋ جۇمىستارىنىڭ كولەمى ارتادى. تەرەڭدىگى  24110 مەتر بولاتىن 14 ۇڭعىمانى بۇرعىلاۋ جوسپارلانىپ وتىر.

 2015-2016 - جىلدار ارالىعىندا مۇناي قورى 5 ميلليون تونناعا ارتادى دەپ بولجانىپ وتىر.