بيىل «قازاقستان بارىسى» تۋرنيرىنىڭ فينالى 5- شىلدە كۇنى وتپەيتىن بولدى
«بيىلعى «قازاقستان بارىسى» بەسىنشى فينالدىق دوداسىنىڭ وتەتىن كۇنى استانا كۇنى مەرەكەسىنە وراي شىلدەنىڭ 5- كۇنى وتەدى دەپ جوسپارلانعان بولاتىن. الايدا، بۇل كۇنى استانا كۇنىنە ارنالعان ءىس-شارالاردىڭ تىعىزدىعىنا بايلانىستى 4- شىلدەگە اۋىستىرىلدى»، دەلىنگەن حابارلامادا.
ءبىراق، التىن «تايتۇياق» پەن چەمپيوندىق بەلبەۋ يەگەرىن، سونداي-اق، جىلدىڭ ۇزدىك بالۋانىن انىقتايتىن «قازاقستان بارىسى» تۋرنيرىنىڭ فينالدىق جارىسىنىڭ وتەتىن كۇنى وزگەرگەنىمەن جارىس وتەتىن ورنى وزگەرمەگەن. ايتۋلى دودا بۇرىنعىداي استانا قالاسىنداعى «سارىارقا» رەسپۋبليكالىق ۆەلوترەگىندە وتەدى. جارىس ساعات 12:00-دە باستالادى.
ەلىمىزدەگى ەڭ ءىرى دودا «قازاقستان بارىسى» تۋرنيرىنىڭ فينالدىق جارىسىنا كىرۋ بيلەتتەرى كەلەسى اپتادان باستاپ ساتىلا باستايدى. بيلەت ساتىلاتىن ورىندار «قازاقستان بارىسى» قازاق كۇرەسىن دامىتۋ قورىنىڭ رەسمي سايتىندا جاريالانادى.
جوبانى ۇيىمداستىرۋشىلار: قازاقستان رەسپۋبليكاسىنىڭ تۇڭعىش پرەزيدەنتى - ەلباسىنىڭ قورى، «نۇر وتان» پارتياسى، قازاقستان رەسپۋبليكاسىنىڭ مادەنيەت جانە سپورت مينيسترلىگى، استانا قالاسى اكىمدىگى، «استانا» پرەزيدەنتتىك كاسىبي سپورت كلۋبى، ق ر قازاق كۇرەسى فەدەراتسياسى، «قازاقستان بارىسى» قازاق كۇرەسىن دامىتۋ قورى.
كۇنسۇلتان وتارباي