ەلباسى كوڭىلىن 5-سىنىپ وقۋشىسىنىڭ شىعارماسى تولقىتتى

استانا. قازاقپارات - اقتاۋلىق وقۋشىنىڭ ەلباسى اتىنا جازعان شىعارماسى نۇرسۇلتان نازاربايەۆتىڭ كوڭىلىن تولقىتتى.

مەملەكەت باسشىسى ۇلىقتاۋ راسىمىندە كارينا دانيلوۆانىڭ اق قاعازعا تۇسىرگەن تۋىندىسىنان ءۇزىندى كەلتىردى. 12 جاستاعى اقتاۋلىق وقۋشى «مەنىڭ پرەزيدەنتىم» اتتى شىعارماسىندا ءارقاشان دا بەيبىت ەلدە، اشىق اسپان استىندا ءومىر سۇرگىسى كەلەتىنىن ايتقان.

5-سىنىپتا وقيتىن كارينا دانيلوۆا اقتاۋ قالاسىندا دۇنيەگە كەلدى. ءبىراق ونىڭ اتا-باباسى تاجىكستان مەن شەشەنستانداعى قاقتىعىستاردىڭ سالدارىنان قازاقستاننان پانا تاپقان. شىعارماسىندا «ەلىمىزدەگى تىنىشتىقتى ساقتاۋدا ەلباسىنىڭ قوسقان ۇلەسى زور»، - دەگەن جولداردى كەلتىرگەن كارينا ءوز تاعدىرىن بەرەكەسى مەن بىرلىگى جاراسقان قازاقستانمەن بايلانىستىرادى.

وقۋدا وزات، دارىندى قىز دومبىرا دا شەرتە الادى. قازىر قازاق ءتىلىن ۇيرەنىپ ءجۇر.

كارينا دانيلوۆا، 5-سىنىپ وقۋشىسى:

- مەنىڭ انام اتا مەن اجەمنىڭ «ەڭ باستىسى -  بەيبىتشىلىك پەن اشىق اسپان» دەگەن سوزدەردى عۇمىر بويى ايتىپ وتكەنىن ءجيى ەسكە الىپ وتىرادى. تۋعان-تۋىستارىم دا وسى سوزدەردى قايتالاۋدان جالىققان ەمەس جانە مەن بىرلىگى جاراسقان قازاقستاندا ءبىلىم الىپ، ءومىر ءسۇرىپ جاتقانىم ءۇشىن باقىتتىمىن.

ال ەلىمىزدەگى تىنىشتىقتى قامتاماسىز ەتۋدە نۇرسۇلتان ءابىش ۇلىنىڭ سىڭىرگەن ەڭبەگى شەكسىز. مەن ءوز پرەزيدەنتىمدى، ەلىمدى جاقسى كورەمىن جانە مەنىڭ شىعارماما نازار اۋدارعان ەلباسىنا راقمەت ايتامىن. بۇل مەن ءۇشىن ۇلكەن ماقتانىش.

ليدا سۇلتانوۆا، ۇستازى:

- جەتىستىكتەرى وتە كوپ. شاحمات، دومبىرا ۇيىرمەسىنە قاتىسادى. وتە دارىندى وقۋشى. ءوز قاتارىنىڭ الدىندا كەلە جاتقان وقۋشى.

www.24.kz