پاۆلودار وبلىسى اكىمىنىڭ بۇرىنعى ورىنباسارى 5 جىلعا سوتتالدى
بۇگىن پاۆلودارداعى مامانداندىرىلعان اۋدانارالىق قىلمىستىق سوتتا پاۆلودار قالاسىنداعى مەكتەپ قۇرىلىسى بويىنشا كونكۋرستا جەڭىسكە جەتۋ ءۇشىن «قولاقى» بەرۋ مەن العانى ءۇشىن ايىپتالعان 5 ازاماتقا قاتىستى ۇكىم شىعارىلدى.
پاۆلودار وبلىسى اكىمىنىڭ بۇرىنعى ورىنباسارى ارسلان ءابدىقالىقوۆ بەس جىلعا باس بوستاندىعىنان ايىرىلدى، جانە 6 جىل مەملەكەتتىك قىزمەتتەن شەتتەتىلدى.
ال وبلىس اكىمىنىڭ ەكس-كەڭەسشىسى تولەگەن باستەنوۆ ءۇش جارىم جىلعا سوتتالدى.
قوس ازامات جازالارىن جالپى رەجيمدەگى كولونيادا وتەيدى.
ايتا كەتكەن ءجون، ەكس-شەنەۋنىكتەر پاۆلودار وبلىسىنىڭ مىنبەرىندە بۇرىنعى وبلىس اكىمى ەرلان ارىننىڭ كەزىندە قىزمەت اتقارعان بولاتىن. ەستەرىڭىزگە سالا كەتەيىك، ەكس- اكىم ەرلان ارىننىڭ ءوزى قىزمەتتىك لاۋازىمىن اسىرا پايدالانعانى ءۇشىن وتكەن جىلدىڭ قاراشا ايىندا 3 جىلعا شارتتى تۇردە سوتتالدى.
سونداي-اق 5 جىل مەملەكەتتىك قىزمەتتەن شەتتەتىلدى. سونداي-اق بۇگىن مامانداندىرىلعان اۋدانارالىق قىلمىستىق سوتتىڭ سۋدياسى ادىلەت باقتياروۆ قالعان 3 شەنەۋنىككە دە ۇكىم شىعاردى. سەمەيلىك «س د ە» قۇرىلىس كومپانياسىنىڭ يەسى زاۋر مانسۇروۆ مەن كاسىپكەر بەكبولات اپسالياموۆ پارا الۋعا يتەرمەلەۋ بويىنشا كىنالى دەپ تانىلدى.
ال پاۆلودارلىق كاسىپكەر عيزات بورامبايەۆ دەلدالدىق ەتكەنى ءۇشىن كىنالى بولدى. ولار جاڭا كودەكس نەگىزىندە سوتتالعاندىقتان، سۋديا ادىلەت باقتياروۆ ولاردى باس بوستاندىعىنان ايىرۋ مەرزىمىن ايىپپۇلمەن الماستىرۋدى شەشتى. ز. مانسۇروۆ پارا سوماسىنىڭ 10 ەسە قۇنىن وتەۋ تۇرىندەگى ايىپپۇل سالىندى، ياعني ول 87 ميلليون تەڭگە تولەۋى ءتيىس.
عيزات بورامبايەۆ پەن بەكبولات اپسالياموۆقا 43 ميلليون تەڭگە كولەمىندە ايىپپۇل تۇرىندەگى جازا تاعايىندادى. سوتتالعانداردىڭ بارلىعىنىڭ مۇلكى تاركىلەنۋى ءتيىس.
ارسلان ءابدىقالىقوۆ سوت زالىندا قاماۋعا الىنسا، زاۋر مانسۇروۆ بوساتىلدى.
اۆتورى: ەرحان تاتكەن
www.24.kz
