اكادەميك، «قازاق ءتىلى» قوعامى پرەزيدەنتىنىڭ 5 تومدىق تاڭدامالى ەڭبەكتەرىنىڭ تۇساۋكەسەرى وتەدى
«قازاق تەرمينولوگياسىنىڭ ماسەلەلەرى» اتتى العاشقى كىتاپتا تەرمينولوگيانىڭ ءتىل قۇرىلىمىنداعى ءرولى، ءجۇز جىلعا تاياۋ تاريحى، جاسالۋ كوزدەرى مەن پرينسيپتەرى، ادەبي ءتىلدى دامىتۋداعى ورنى جانە ت. ب. وزەكتى ماسەلەلەر سارالانىپ، عالىمنىڭ تىڭ كوزقاراستارى ۇسىنىلادى.
«قازاق فرازەولوگيزمدەرى مەن پەريفرازدارى» كىتابىندا تىلىمىزدەگى تۇراقتى فرازەولوگيزمدەردىڭ جانە اۋىسپالى، استارلى ماعىناداعى پەريفرازداردىڭ ءار الۋان قولدانىس ورتاسىنداعى تابيعاتى ءسوز بولادى.
«تىلتىرەس» اتتى كەزەكتى تومدا قوعام قايراتكەرى ءو. ايتباي ۇلىنىڭ مەملەكەتتىك ءتىلدى قالىپتاستىرۋ حاقىنداعى ويلارى مەن حالىقارالىق «قازاق» ءتىلى قوعامىنىڭ ءتىل مايدانىنداعى شيرەك عاسىرلىق قىزمەتى جان- جاقتى باياندالادى.
«ءتىل عۇمىرلار» كىتابىندا ا. بايتۇرسىن ۇلى، ق. جۇبانوۆ باستاعان ءتىلشى-عالىمدار، س. سەيفۋلليننەن باستاپ ءى. جارىلقاپوۆقا دەيىنگى ءتىل جاناشىرلارى تۋرالى عىلىمي دايەگى جوعارى ءارى كوركەم ەسسە تۇرعىسىنان جازىلعان قۇندى ەڭبەكتەر توپتاستىرىلعان.
«وسنوۆى كازاحسكوي تەرمينولوگيي» اتتى سوڭعى تومعا عالىم ەڭبەكتەرىنىڭ ورىس ءتىلدى اۋديتورياعا ۇسىنعان باستى- باستى عىلىمي تۇجىرىمدارى، مەملەكەتتىك ءتىلدىڭ مارتەبەسىن كوتەرۋ تۋرالى بايانداما، سۇحباتتارى ەنگىزىلگەن. سونداي-اق عالىم ەڭبەكتەرىنىڭ تولىق بيبليوگرافياسى مەن فوتويلليۋستراتسيالار دا قامتىلعان.
ءىس- شارا اياسىندا ۇلتتىق كىتاپحانانىڭ قورىنان ءو. ايتباي ۇلىنىڭ ءومىرى مەن شىعارماشىلىعىنا ارنالعان بەزەندىرىلگەن كىتاپ كورمەسى ۇيىمداستىرىلادى.
