بومبا تۋرالى جالعان قوڭىراۋ تاراتقان كەلىنشەك 5 جىلعا سوتتالدى

قىزىلوردا. قازاقپارات - ۇيالى تەلەفون ارقىلى  قىزىلوردا و ءى ءى د-ءنىڭ جەدەل باسقارۋ ورتالىعىنىڭ 102 نومىرىنە قوڭىراۋ شالىپ،  قىزىلوردا ستانسياسىنىڭ تەمىر جول ۆوكزالىندا بومبا قويىلعان دەپ تەرروريزم اكتىسى تۋرالى كورىنەۋ جالعان حابارلاما بەرگەن 28 جاسار ازاماتشا 5 جىلعا سوتتالدى. بۇل تۋرالى  قىزىلوردا قالالىق سوتىنىڭ باسپا ءسوز قىزمەتى حابارلادى.

سوتتالۋشىعا جازا تاعايىنداۋ كەزىندە قىلمىستىڭ سيپاتى مەن قوعامدىق قاۋىپتىلىك دارەجەسىن، ونىڭ بۇرىن سوتتى بولماعانىن، اۋىلداستارى جاقسى مىنەزدەمە بەرگەندەرىن، قىلمىستىق جاۋاپتىلىقتى جەڭىلدەتەتىن ءمان-جايىن، جانۇيا جاعدايىن، كامەلەتكە تولماعان جاس بالالارى بارىن، تاعايىندالعان جازانىڭ ونىڭ تۇزەلۋىنە جانە ونىڭ وتباسىنىڭ، اسىراۋىنداعى ادامداردىڭ تىرشىلىك جاعدايىنا ىقپالىن ەسكەرىپ، 5 (بەس) جىلعا باس بوستاندىعىن شەكتەۋگە جازالاندى. ونىڭ مىنەز-قۇلقىن قاداعالاۋ سىرداريا اۋداندىق قىلمىستىق-اتقارۋ ينسپەكسياسىنا جۇكتەلدى.

سونىمەن قاتار ءىس بويىنشا ازاماتتىق تالاپكەرلەر پايداسىنا كەلتىرىلگەن زيانداردى وندىرۋگە ۇكىم ەتىلدى. ۇكىم زاڭدى كۇشىنە ەنگەن جوق.

اۆتور: ەلۋباي اۋەزوۆ