بيىل 5 مىڭ قازاقستاندىق قاجىعا بارادى - فوتو
قازاقستان مۇسىلماندارى ءدىني باسقارماسى قاجىلىق ميسسياسىنىڭ ءتوراعاسى، اپپارات باسشىسى عىلىمبەك ماجيەۆ، قاجىلىق ساپارىندا ۋاعىزشىلار توبىنا جەتەكشىلىك ەتەتىن شاريعات جانە ءپاتۋا ءبولىمىنىڭ قىزمەتكەرى سانسىزباي شوقانوۆ، الماتى قالاسى ورتالىق مەشىتىنىڭ باس يمامى نۇربەك ەسماعامبەتوۆ وتانداستارىمىزعا ءسات-ساپار تىلەپ، كەڭەستەرىمەن ءبولىستى.
«قاجىلىق - ادام ءومىرىن ىزگى باعىتقا وزگەرتەتىن، رۋحاني كەمەلدەنەتىن، يماندىلىقتى ارتتىراتىن قۇلشىلىق. بيىل باس ءمۇفتي ەرجان قاجى مالعاجى ۇلىنىڭ باستاماسىمەن قاجىلىق ميسسياسىنا 30 ادام ءبولىندى. دارىگەرلەرىمىز بەن يمامدارىمىز، قاجىلىق كومپانيا وكىلدەرى بارشاڭىزعا 24 ساعات بويى قىزمەت ەتەدى. ەڭ باستىسى، تارتىپكە باعىنىپ، اۋىزبىرشىلىك تانىتساق، ساپارىمىز ءساتتى بولاتىنىنا سەنەمىن»، - دەدى عىلىمبەك جادىگەر ۇلى.
اپپارات جەتەكشىسى قاجىلىققا نيەت ەتكەن وتانداستار سانى جىل سايىن ارتىپ كەلە جاتقانىن جەتكىزدى. ماسەلەن، 2009-جىلى ەلىمىزدەن 2800 ادام قاجىلىققا اتتانسا، 2010-جىلى بۇل كورسەتكىش 3300 گە جەتكەن. وتكەن جىلى 4000 نان استام ادام قاجىلىعىن وتەسە، بيىل، ياعني 2014-جىلى 5000 جەرلەسىمىز ۇلى ساپارعا دايىندالۋدا.
«كەيبىر ەلدەردە مۇسىلماندار قاجىلىققا بارۋ ءۇشىن كەزەككە تۇرادى. ويتكەنى، بولىنگەن كۆوتا سانى شەكتەۋلى. ءتىپتى، كەزەگى كەلمەي، دۇنيە سالاتىن ادامدار دا بار. اللاعا شۇكىر، ءبىزدىڭ ەلدە باۋىرلارىمىز ەمىن-ەركىن كەزەكسىز بارىپ كەلۋدە. اللا تاعالا بارشامىزدىڭ قاجىلىعىمىزدى قابىل ەتىپ، امان-ەسەن ەلگە ورالۋىمىزدى ءناسىپ ەتكەي»، - دەدى ع. ماجيەۆ.
قاجىلىق ميسسياسى قۇرامىندا 2 بىلىكتى ۋاعىز ايتاتىن يمام، 4 دارىگەر، جۋرناليستەر توبى بار. ال 20 قاجىلىق كومپانياسىنا 25 يمام ءبولىندى. ءدىن قىزمەتكەرلەرى قاجىلاردىڭ سۇراقتارىنا جاۋاپ بەرەدى جانە قۇلشىلىقتى دۇرىس ورىنداۋ شارتتارىن ءجىتى تۇسىندىرەدى.
بۇگىنگى باس قوسۋدا ۋاعىزشىلار توبىنىڭ جەتەكشىسى سانسىزباي شوقانوۆ قاجىلىقتىڭ قاسيەتى مەن ارتىقشىلىقتارى تۋرالى ۋاعىز ايتىپ، دۇعا جاسادى.
