ءبۇلدىرشىن قىزدى كۇڭدىكتە ۇستاپ كەلگەن تۇرعىن 5 جىلعا سوتتالۋى مۇمكىن

الماتى. قازاقپارات - 9 جاسار قىزدى كۇڭدىكتە ۇستاپ كەلگەن الماتى وبلىسى ۇزىناعاش اۋىلىنىڭ تۇرعىنى قاماۋعا الىندى. قازىر كەلىنشەككە قارسى ق ر ق ك 126- بابى بويىنشا قىلمىستىق ءىس قوزعالدى.

بۇل تۋرالى قازاقپارات تىلشىسىنە الماتى وبلىستىق ءى ءى د باسپا ءسوز قىزمەتىنىڭ وڭتۇستىك وڭىرلىك وكىلى گۇلنار ماعزۇموۆا حابارلادى.

«قازىر كۇدىكتىگە قارسى ق ر ق ك 126- بابىنىڭ ەكىنشى تارماعى بويىنشا (ادامدى باس بوستاندىعىنان زاڭسىز ايىرۋ) قىلمىستىق ءىس قوزعالدى. كۇدىكتى ۋاقىتشا وقشاۋلاۋ كامەراسىنا قامالدى. ەگەر ونىڭ ايىبى دالەلدەنىپ، سوت كىنالى دەپ تاپسا، كامەلەتتىك جاسقا تولماعان بالانىڭ باس بوستاندىعىن شەكتەگەنى ءۇشىن 5 جىلعا دەيىن باس بوستاندىعىنان ايرىلۋى مۇمكىن»، - دەدى گ. ماعزۇموۆا.

ونىڭ ايتۋىنشا، قازىر 9 جاسار گۇلنۇردىڭ اتا-اناسى ىزدەستىرىلۋدە. ازىرگە بالادان سۇراۋ الىنىپ جاتقان جوق. سەبەبى، قازاقستان زاڭناماسى كامەلەتكە تولماعان بالالاردى تەرگەۋگە قاتىستىرۋعا تىيىم سالادى.

ەستەرىڭىزگە سالا كەتەيىك، الماتى وبلىسىندا 9 جاسار قىز بالانىڭ 10 اي بويى قۇلدىقتا ۇستالىپ كەلگەندىگى جايلى كەشە حابارلاعان بولاتىنبىز.

قىزدىڭ ايتۋىنشا، ول 10 اي بويى ۇزىناعاش ماڭىنداعى جاڭاقۇرىلىس اۋىلىندا ءبىر ۇيدە تاياق پەن تەپكىنىڭ استىندا ەركىنەن تىس جۇمىسقا جەگىلىپ كەلگەن. ونىڭ دەنەسىندەگى ءتۇرلى جاراقاتتارى مەن سىزاتتارى ءسوزىنىڭ راس ەكەندىگىن ايعاقتايدى.

قاشىپ شىققان قىزدى كورشىلەرى بايقاپ بىردەن ب ا ق وكىلدەرىن شاقىرعان.

ءباسپاسوز حاتشىسىنىڭ ايتۋىنشا، كۇدىكتى كەلىنشەك ءوزىنىڭ ايىبىن مويىنداماي وتىر. ءبىر سوزىندە «قىزدى بازاردان تاۋىپ الدىم» دەسە، ءبىر سوزىندە «قۇربىمنىڭ قىزى» دەپ ايتىپ جاتىر.

ال گۇلنۇر كامەلەتكە تولماعانداردى بەيىمدەۋ ورتالىعىندا سوت-مەديتسينالىق ساراپتامادان وتۋدە. وعان سونداي-اق پسيحولوگيالىق جانە مەديتسينالىق كومەك كورسەتىلىپ جاتىر.

اۆتور: گۇلميرا عوسمانالي