اۆستراليادا 5 مەترلىك قولتىراۋىننىڭ ىشىنەن ادام دەنەسىنىڭ قالدىعى تابىلدى

 الماتى. قازاقپارات - اۆستراليانىڭ كاكادۋ ساياباعىنداعى 5 مەترلىك قولتىراۋىننىڭ اسقازانىنان ادام دەنەسىنىڭ قالدىعى تابىلدى. بۇل تۋرالى Associated Press اگەنتتىگى حابارلادى.

پوليتسيا قىزمەتكەرلەرىنىڭ پايىمداۋىنشا، ول جوعالىپ كەتكەن 62 جاسار تۋريستىڭ دەنەسى بولۋى مۇمكىن.

قايعىلى وقيعا 7 -  ماۋسىمدا ورىن العان. 5 مەترلىك الىپ رەپتيليا قايىقتا سەرۋەندەپ جۇرگەن ادامدارعا شابۋىل جاساپ، 62 جاسار ەر ادامدى سۇيرەپ كەتكەن بولاتىن. جانتۇرشىگەرلىك وقيعا ەر ادامنىڭ زايىبى، كەلىنى مەن بالاسىنىڭ كوز الدىندا بولدى. جاقىندارى ونى سوڭعى رەت قولتىراۋىننىڭ ازۋىنان كورگەن بولاتىن.

امالى قۇرىعان پوليتسيا قىزمەتكەرلەرى جانۋاردى اتۋعا ءماجبۇر بولدى.

 ازىرگە، اتى اتالماي وتىرعان ازاماتتىڭ دەنەسى ءدال سول ەكەندىگى انىقتالعان جوق.

بۇل اۆستراليا قولتىراۋىندارىنىڭ ادامدارعا قارسى ءبىرىنشى شابۋىلى ەمەس. وسىعان دەيىن كولدە شومىلىپ جۇرگەن 12 جاسار ەر بالا مەن 7 جاسار قىز بالا الىپ قولتىراۋىننىڭ ازىعىنا اينالعان ەدى.

 اۆتور: گۇلميرا عوسمانالي