قاڭتار وقيعاسى: 594 ايىپتالۋشىعا قاتىستى ءىس سوتقا جولداندى
بۇل تۋرالى ق ر ءى ءى م تەرگەۋ دەپارتامەنتى باستىعىنىڭ ورىنباسارى مۇحتار قوجايەۆ ايتتى، دەپ حابارلايدى قازاقپارات ءتىلشىسى.
«قايعىلى قاڭتار وقيعاسىنىڭ سەبەبىن، تەرروريستىك اكتىلەر مەن جاپپاي تارتىپسىزدىكتەردى ۇيىمداستىرۋشىلاردى انىقتاۋ جانە تەرگەۋمەن ارنايى پروكۋرورلار جەتەكشىلىگىمەن ۆەدومستۆوارالىق جەدەل-تەرگەۋ توپتارى اينالىسىپ جاتقانىن ەستەرىڭىزگە سالامىز. وكىلەتتىكتى اسىرا پايدالانۋ جانە تەرگەۋ مەن انىقتاۋدىڭ رۇقسات ەتىلمەگەن ادىستەرىنە ازاماتتاردىڭ شاعىمدارى بويىنشا تەرگەۋدى سىبايلاس جەمقورلىققا قارسى قىزمەتتىڭ قىزمەتكەرلەرى، جەكەلەگەن جاعدايلاردا ارنايى پروكۋرورلار جۇرگىزۋدە»، - دەدى ول ورتالىق كوممۋنيكاتسيالار قىزمەتىندەگى بريفينگ بارىسىندا.
ونىڭ اتاپ وتۋىنشە، ىشكى ىستەر ورگاندارىنىڭ جەدەل-تەرگەۋ توپتارى جاپپاي تارتىپسىزدىكتەر اياسىندا جاسالعان ۇرلىق، توناۋ، بۇزاقىلىق، مۇلىكتى قاساقانا ءبۇلدىرۋ، قارۋدى ۇرلاۋ، ءارى ساقتاۋ سياقتى فاكتىلەردى تەرگەۋدە.
«پوليتسيا قاڭتار ايىنداعى وقيعالار بويىنشا بارلىعى 4642 قىلمىستىق ءىس قوزعادى. ونىڭ ىشىندە: 2,5 مىڭنان استامى - ۇرلىق، 708 ءى - قارۋدى ۇرلاۋ نەمەسە ساقتاۋ، 418 ءى - بۇزاقىلىق، 199 ى مۇلىكتى جويۋ، 26 سى قاراقشىلىق جانە توناۋ فاكتىسى. وسى قىلمىستىق ىستەر اياسىندا پوليتسيا تەرگەۋشىلەرى 15 مىڭعا جۋىق ادامنان جاۋاپ الدى. 35 مىڭنان استام تەرگەۋ ارەكەتتەرى جانە 2,5 مىڭ ساراپتاما جۇرگىزىلدى. 1731 ازامات جابىرلەنۋشى بولىپ تانىلدى. 343 ميلليون تەڭگەدەن استام سوماعا شىعىندى وتەۋ قامتاماسىز ەتىلدى»، - دەدى مۇحتار قوجايەۆ.
ءى ءى م وكىلىنىڭ دەرەگىنشە، بۇگىندە 969 ءىستى تەرگەۋ اياقتالىپ، ونىڭ ىشىندە 594 ايىپتالۋشىعا قاتىستى ءىس سوتتارعا جولداندى. سوتتا قاراۋ ناتيجەسىدە 500 ادامعا قاتىستى ۇكىم شىقتى. ولاردىڭ كوپشىلىگى، ناقتى ايتقاندا 398 ادامنىڭ باس بوستاندىعىنان شەكتەلدى.
ال اۋىر جانە اسا اۋىر قىلمىس جاساعان 92 ادام عانا باس بوستاندىعىنان ايىرۋعا سوتتالدى.
«قازىر پوليتسيا تەرگەۋشىلەرىنىڭ وندىرىسىندە 289 ءىس بار. ونىڭ ىشىندە 20 سى بويىنشا 27 كۇدىكتى انىقتالعان. ولاردىڭ 6 اۋى كۇزەتپەن قاماۋدا ۇستالۋدا. جاقىن ارادا بۇل قىلمىستىق ىستەر بويىنشا تۇپكىلىكتى شەشىم قابىلداۋ جوسپارلانعان. بۇل رەتتە، ىشكى ىستەر مينيسترلىگى سوتقا دەيىنگى تەرگەۋ بارىسىندا ازاماتتاردىڭ كونستيتۋتسيالىق قۇقىقتارىنىڭ ساقتالۋىن ءارى بۇزىلماۋىن قاتاڭ باقىلاۋدا ۇستاۋدا»، - دەدى دەپارتامەنت باستىعىنىڭ ورىنباسارى.
