پاۆلوداردا 59 جاستاعى انا بالالار ۇيىنەن 20 بالانى قاناتىنىڭ استىنا العان - فوتو
ولاردىڭ ۇشەۋى عانا - تۋعانى بولسا، توعىزى - قامقورشى جانە قورعانشىلىقتا، جەتەۋى - پاتروناتتى تاربيەدە، تورتەۋى - اسىراپ الىنعان بالالار. بۇعان قوسا، ەكاتەرينا الەكساندروۆنا 2013 -جىلى قاڭتار ايىندا ەرەكشە كۇتىمدى قاجەت ەتەتىن، مۇمكىندىگى شەكتەۋلى بالانى قامقورشىلىعىنا الۋعا قۇجات راسىمدەگەن.
ەكاتەرينا ياتسەنكو 1977 -جىلى گەرمان ياتسەنكومەن شاڭىراق كوتەرىپ، ەكى جىلدان سوڭ تۇڭعىشتارى نينا، ونىڭ سوڭىنان نادەجدا جانە پولينا ەسىمدى قىزدارى دۇنيەگە كەلگەن.
«ءوزىم اجەم مەن تاتەمنىڭ قولىندا وسكەندىكتەن، اتا- انانىڭ مەيىرىمىنە مۇقتاج بالالاردى باۋىرىما باسۋدى ءجون كوردىم. انام دۇنيەدەن ەرتە وزدى. ال اكەم بولسا، باسقا وتباسىمەن تۇردى»، - دەيدى ەكاتەرينا ياتسەنكو.
بۇگىندە دەنيس، الەكساندر، اندرەي، ەكاتەرينا، ەرجان - مەكتەپ وقۋشىلارى، قالعاندارى - كامەلەتتىك جاسقا تولعان. 2002 -جىلى قامقورلىققا العان ارينا - قاراعاندى مەملەكەتتىك ۋنيۆەرسيتەتى زاڭ فاكۋلتەتىنىڭ ستۋدەنتى. وتباسىنىڭ ەڭ كەنجەسى زارينا - سەگىز جاستا.
وبلىستا پاتروناتتى تاربيەنى دامىتۋ تاريحى 2004 -جىلدان باستاۋ الادى. وسى جىلدان باستاپ ياتسەنكو وبلىستىق ءبىلىم بەرۋ باسقارماسىنىڭ پاتروناتتى وتباسىلار ەسەبىندە تۇرعان.
«العاشقى بولىپ ۋسپەن اۋدانىنىڭ تۇرعىنى مارجان امري بىردەن اعايىندى بۋزوۆتار مەن زارينا، ءادىل ەسىمدى قوس بالانى باۋىرىنا باسىپ، پاتروناتتى تاربيەگە العان. بۇگىنگى كۇنى ءتورت بالا دا پاتروناتتان شىقسا دا، وتباسىلىق قارىم- قاتىناستى ۇزبەگەن. مارجان امري دە ءوز تاربيەلەنۋشىلەرىنە ءالى دە كومەك كورسەتۋدەن تايىنعان ەمەس»، - دەيدى وبلىستىق ءبىلىم بەرۋ باسقارماسى باسشىسىنىڭ ورىنباسارى سايان مۇقانوۆ.
وبلىستىق ءبىلىم بەرۋ باسقارماسى ۇسىنعان دەرەككە سۇيەنسەك، بۇگىندە وڭىردە جەتىم جانە اتا- اناسىنىڭ قامقورلىعىنسىز قالعان 1799 بالا تۇرادى. سوڭعى رەت 2011 -جىلى حالىقارالىق بالا اسىراپ الۋ تىركەلىپ، پاۆلودارلىق ءۇش بالعىن شەتەل اسىپ كەتكەن.
