استانادا پاراشيۋتپەن سەكىرگەن 58 جاستاعى ەر ادام قايتىس بولدى

بۇل حاباردى مارقۇمنىڭ كەلىنى الەۋمەتتىك جەلىدە جازعان ەدى. پاراشيۋتپەن سەكىرۋدى ۇيىمداستىرعان كومپانيا بولعان وقيعانى راستادى.
«راسىندا دا كەشە ەر ادام جەرگە دۇرىس قونباي، جامباسىن سىندىرىپ الدى. ونى جەدەل جاردەم الىپ كەتتى. وكىنىشكە قاراي، بىزبەن ەشكىم بايلانىسقان جوق، بۇل حاباردى الەۋمەتتىك جەلىلەردەگى ادامداردان ءبىلىپ وتىرمىز. بىزدە كوپ جىلدىق تاجىريبەسى بار بىلىكتى نۇسقاۋشىلار بار، نۇسقاۋلىق وتە مازمۇندى، قاۋىپسىزدىك ەرەجەلەرىنىڭ بارلىق نيۋانستارى قامتىلعان. بىزدە كەزەكشى دارىگەر جوق، ءبىراق قاجەت بولعان جاعدايدا العاشقى مەديتسينالىق كومەك كورسەتۋگە قاجەت نارسەنىڭ ءبارى بار. جامباستىڭ سىنۋى كەزىندە ءبىز تەك قانا ادامدى قوزعالىسسىز قالدىرىپ، جەدەل جاردەمدى كۇتە الامىز»، - دەپ جازدى ۇيىمداستىرۋشى كومپانيا.
بۇل اقپاراتتى ەلوردالىق پوليتسيا دەپارتامەنتىنىڭ باسپا ءسوز قىزمەتى دە راستادى.
«بيىل 31 - شىلدە كۇنى الماتى اۋدانى پ ب كەزەكشى بولىمىنە كوپسالالى قالالىق اۋرۋحانادان حابار ءتۇستى. وندا رەانيماتسيادا جاتقان ناۋقاستىڭ قايتىس بولعانى ايتىلعان. 58 جاستاعى اۋىر جاراقاتى بار ەر ادامدى جەدەل جاردەم بريگاداسى استانا- كوكشەتاۋ تاسجولىندا ورنالاسقان پاراشيۋت كلۋبىنان وسىندا جەتكىزگەن»، - دەپ حابارلادى ۆەدومستۆو.
پوليتسيا باسقارماسى اتاپ وتكەندەي، وسى فاكت بويىنشا سوتقا دەيىنگى تەرگەۋ باستالدى.
قاجەتتى سوت- مەديتسينالىق ساراپتامالار تاعايىندالعان.
ولاردىڭ ناتيجەسى بويىنشا قولدانىستاعى زاڭناماعا سايكەس قۇقىقتىق باعا بەرىلەدى.
ق ر ق ى ج ك- ءنىڭ 201-بابى نەگىزىندە وزگە دەرەكتەر جاريا ەتىلمەيدى.