بيىل 58 بالا ءومىرىن سۋيتسيدپەن اياقتادى - مينيستر تۇرعىمبايەۆ
بۇل تۋرالى بۇگىن ق ر ىشكى ىستەر ءمينيسترى ەرلان تۇرعىمبايەۆ ورتالىق كوممۋنيكاتسيالار قىزمەتىندە وتكەن حالىقپەن ونلاين كەزدەسۋىندە ايتتى، دەپ حابارلايدى قازاقپارات ءتىلشىسى.
«جاسوسپىرىمدەر اراسىنداعى سۋيتسيد تاعى ءبىر وزەكتى پروبلەما بولىپ تۇر. جىل باسىنان بەرى 58 بالا ءوز- وزىنە قول جۇمساپ ومىردەن ءوتتى جانە 137 بالا سۋيتسيد جاساۋعا تىرىستى. بۇعان قوسا، جاسوسپىرىمدەر اراسىنداعى بارلىق سۋيتسيدتىڭ جارتىسى توتەنشە جاعداي كەزەڭىندە ورىن العان. ياعني، ولاردىڭ سەبەبى نەگىزىنەن، وتباسىلىق پروبلەمامەن بايلانىستى بولىپ وتىر»، - دەدى ەرلان تۇرعىمبايەۆ.
وسى ورايدا ول قازىرگى ۋاقىتتا الەۋمەتتىك جەلىدە بالالار قۇقىعىن قورعاۋ ماسەلەسى وتە ءجيى كوتەرىلەتىندىگىن، الايدا، قۇر ۇراننان ارى اسپاي وتىرعاندىعىن باسا ايتتى.
«بۇگىنگى مۇمكىنشىلىكتى پايدالانا وتىرىپ، قوعامدىق قوزعالىستاردى، ۇكىمەتتىك ەمەس ۇيىمداردى ءوسىپ كەلە جاتقان بۋىنىمىزدىڭ قورعالۋىن قامتاماسى ەتۋ، وتباسى ينستيتۋتىنىڭ ءرولىن ارتتىرۋ ءۇشىن كۇش بىرىكتىرۋگە شاقىرامىن»، - دەدى مينيستر.
