58 ەلدى مەكەن كولىك قاتىناسىنسىز قالدى - قانات بوزىمبايەۆ
استانا. KAZINFORM - ق ر پرەمەر-ءمينيسترىنىڭ ورىنباسارى قانات بوزىمبايەۆ ەل اۋماعىن سۋ باسۋ قاۋپى تۋرالى سوڭعى مالىمەتتەرمەن ءبولىستى.
«سۋ تاسقىنىنا قاتىستى جاعداي كۇردەلى كۇيىندە قالىپ وتىر. 6 وڭىردە 3698 جەكە ءۇي سۋ استىندا قالدى جانە اۆتوجولداردىڭ 155 ۋچاسكەسىن سۋ شايدى. توپان سۋ باسقان 88 ۋچاسكە باقىلاۋعا الىندى، ونىڭ ىشىندە 4 كوپىر بار. سونىمەن قاتار 58 ەلدى مەكەنگە كولىك قاتىناسى جوق، ولارعا ازىق-تۇلىك پەن ءدارى- دارمەك جەتكىزىلىپ جاتىر»، - دەدى قانات بوزىمبايەۆ و ك ق-دە وتكەن باسپا ءسوز ءماسليحاتىنا ZOOM ارقىلى قاتىسا وتىرىپ.
ۇكىمەت باسشىسى ورىنباسارىنىڭ مالىمەتىنشە، ەل اۋماعىندا 10 وڭىردە جەرگىلىكتى دەڭگەيدە توتەنشە جاعداي جاريالاندى.
«اۆاريالىق قۇتقارۋ جۇمىستارىنا 17 مىڭنان استام ادام، 1900 تەحنيكاسى جانە 500 گە جۋىق ءجۇزۋ مەن سۋ سورۋ قۇرالدارى جۇمىلدىرىلدى. توتەنشە جاعداي جاريالانعان ايماقتاردان 70 مىڭنان استام ادام كوشىرىلدى، ونىڭ 17 مىڭعا جۋىعى بالا. اۋا رايى بولجامى بويىنشا تاياۋ ارادا كۇن جىلىپ، قار جىلدام ەريدى جانە سۋ قويمالارىنىڭ تولۋى جالعاسادى. بۇگىندە ەل توڭىرەگىنىڭ %15، ال سولتۇستىك، شىعىس جانە ورتالىق وڭىرلەردە %40 جۋىق قار جاتىر»، - دەيدى ول.
ەسكە سالا كەتەيىك، بۇعان دەيىن قازگيدرومەت سۋ باسقان وڭىرلەردەگى اۋا رايى بولجامىن جاريالادى. سونداي-اق ەلىمىزدەگى سۋ باسقان وڭىرلەردىڭ بالالارى ساۋىقتىرۋ ورتالىقتارىنا جىبەرىلىپ جاتىر.
