ۇلتتىق قور سوماسى 57 ميلليارد دوللارعا دەيىن ءوستى
بۇل تۋرالى قازاقپارات ۇلتتىق بانككە سىلتەمە جاساپ حابارلايدى.
ۇلتتىق قورداعى ۆاليۋتالىق اكتيۆتەردىڭ كولەمى الدىن الا بەرىلگەن دەرەكتەرگە سايكەس، وتكەن ايدا 1,9 ميلليارد ا ق ش دوللارىنا ۇلعايىپ، قاڭتار اياعىندا 57,6 ميلليارد دوللاردى قۇرادى.
«الەمدەگى قور نارىقتارى 2023-جىلدى وپتيميزممەن باستادى. ناتيجەسىندە تاۋەكەل-دارەجەسىنىڭ ارتۋى اكسيالار مەن وبليگاتسيالاردىڭ وسۋىنە، سونداي-اق التىن باعاسىنىڭ ايتارلىقتاي ۇلعايۋىنا اسەر ەتتى. ناتيجەسىندە ۇلتتىق قوردىڭ ينۆەستيتسيالىق كىرىسى قاڭتاردا 1,8 ميلليارد ا ق ش دوللارىن قۇرادى. اكتيۆتەردىڭ وسۋىنە ىقپال ەتكەن قوسىمشا فاكتور - ۇلتتىق قورعا تۇسكەن تۇسىمدەر سانالادى. ماسەلەن، قاڭتاردا قورعا تۇسكەن ۆاليۋتالىق تۇسىمدەر 329 ميلليون ا ق ش دوللارىن كورسەتتى. بۇل رەتتە وتكەن ايدا ۇلتتىق قوردان رەسپۋبليكالىق بيۋجەتكە ترانسفەرت تۇرىندە 235 ميلليارد تەڭگە اۋدارىلدى. وسى ماقساتتا ىشكى ۆاليۋتا نارىعىندا 228 ميلليون ا ق ش دوللارى ساتىلدى. ترانسفەرت ءۇشىن قاراجاتتىڭ نەگىزگى بولىگى قورعا تەڭگەلىك تۇسىمدەر ەسەبىنەن ءبولىندى»، - دەدى ۇلتتىق بانك ءتوراعاسىنىڭ ورىنباسارى ءاليا مولدابەكوۆا.
