قازاقستان حالىقارالىق تۇرمە رەيتينگىنىڭ كورسەتكىشى بويىنشا 57- ورىندا - ا. داۋىلبايەۆ - فوتو
استانا. قازاقپارات - قازاقستان حالىقارالىق تۇرمە رەيتينگىنىڭ كورسەتكىشى بويىنشا 57- ورىنعا شىعىپ وتىر. بۇگىن استانادا ءوتىپ جاتقان «تۇرمە رەفورماسىنا» ارنالعان ІIІ فورۋم بارىسىندا ق ر باس پروكۋرورى اسحات داۋىلبايەۆ وسىلاي ءمالىم ەتتى.
ەسكە سالا كەتەيىك، «سەن قوعامعا كەرەكسىڭ!» اتتى جوبانىڭ باستاۋىنا ارنالاتىن بۇل فورۋم بۇرىن سوتتالعان ادامداردى زاڭعا باعىنۋشى ازاماتتار رەتىندە قوعامعا رەينتەگراتسيالاۋعا باعىتتالعان.
«بۇل ءبىزدىڭ ءۇشىنشى جىل سايىنعى فورۋم، مۇنىڭ ءوزى جالپى قولداۋدىڭ ارقاسىندا ءتيىمدى ديالوگ الاڭىنا اينالدى. بۇل الاڭدا پەنيتەنسيارلىق سالانىڭ نەعۇرلىم وتكىر پروبلەمالارى تالقىلانىپ قانا قويماي، ءوز شەشىمىن دە تاۋىپ جاتادى. بۇعان مۇنىڭ الدىندا «تۇرمە حالقىن» ازايتۋعا جانە سوتتالعانداردى جۇمىسپەن قامتاماسىز ەتۋ ماسەلەلەرىنە ارنالىپ وتكىزىلگەن فورۋمدار دالەل بولا الادى»، - دەپ اتاپ ءوتتى باس پروكۋرور.
ونىڭ ايتۋىنشا، 2013 - جىلى «تۇرمە ورنىنا - پروباتسيا جانە ەلەكتروندى بىلەزىكتەر» تاقىرىبىمەن وتكەن ءبىرىنشى فورۋمنىڭ اياسىندا ءبىزدىڭ «تۇرمە حالقىن» ازايتۋ جونىندەگى 10 شارا» جوباسىن ۇسىنىلعان بولاتىن. ونداعى جوسپار بويىنشا قازاقستان 4 جىلدىڭ ىشىندە تۇرمە يندەكسى بويىنشا 50 ەلدىڭ قاتارىنان الىپ شىعۋ تۋرالى باتىل مىندەتتەمە العان ەدى.
«بۇل مىندەتتى ءبىز مەرزىمىنەن بۇرىن ورىنداپ شىقتىق. تاريحقا كوز جۇگىرتەيىك. 1995 - جىلى قازاقستان تۇرمە حالقىنىڭ يندەكسى بويىنشا ا ق ش پەن رەسەيدەن كەيىنگى ءۇشىنشى ورىندا تۇردى. 2012 - جىلى ءبىزدىڭ ەل 33- ورىنعا شىقتى. بۇگىنگى تاڭدا قازاقستان حالىقارالىق تۇرمە رەيتينگىنىڭ كورسەتكىشى بويىنشا 57- ورىندا. وسىلايشا ءبىز كورسەتكىشتەرى حالىقارالىق ساراپشىلار تاراپىنان ەشقاشان سىن تۋدىرماعان لاتۆيا، ەستونيا جانە سينگاپۋر سياقتى مەملەكەتتەردىڭ قاتارىنا كوتەرىلدىك»، - دەدى ا. داۋىلبايەۆ.
ەسكە سالا كەتەيىك، فورۋمدى پارلامەنت ءماجىلىسىنىڭ سوت- قۇقىقتىق رەفورما جانە زاڭناما كوميتەتى، جوعارعى سوت، ىشكى ىستەر مينيسترلىگى، «نۇر وتان» پارتياسى جانىنداعى قۇقىقتىق كەڭەس، ە ى ق ۇ- نىڭ استاناداعى كەڭسەسى جانە باس پروكۋراتۋرانىڭ جانىنداعى قۇقىق قورعاۋ ورگاندارىنىڭ اكادەمياسى ۇيىمداستىرىپ وتىر.
ۇيىمداستىرىلىپ وتىرعان بۇل فورۋم بۇدان بۇرىن وتكەن جيىندار سياقتى مەملەكەت باسشىسىنىڭ پەنيتەنتسيارلىق جۇيەنى رەفورمالاۋ اياسىنداعى تاپسىرمالارىن ىسكە اسىرۋعا ارنالعان جانە بۇرىن سوتتالعان ادامداردى قايتا الەۋمەتتەندىرۋ جۇيەسىنىڭ تيىمدىلىگىن ارتتىرۋعا باعىتتالعان.
