قازاقستاندا جىل باسىنان كيىك براكونەرلىگىنە قاتىستى 56 دەرەك انىقتالدى
بۇل تۋرالى ق ر ەكولوگيا، گەولوگيا جانە تابيعي رەسۋرستار مينيسترلىگى ورمان شارۋاشىلىعى جانە جانۋارلار دۇنيەسى كوميتەتى ءتوراعاسىنىڭ ورىنباسارى دانيار تۇرعامبايەۆ ايتىپ بەردى، دەپ حابارلايدى قازاقپارات ءتىلشىسى.
«براكونەرلىكتى انىقتاۋ جانە جولىن كەسۋ جۇمىستارىن كۇشەيتۋ ماقساتىندا جىل سايىن ءبىزدىڭ مينيسترلىكتىڭ، ءى ءى م مەن ۇ ق ك- ءنىڭ بىرلەسكەن بۇيرىعىمەن كوكتەمگى جانە قىسقى كەزەڭدەردە اۋقىمدى «كيىك» تابيعات قورعاۋ اكسياسىن وتكىزۋ جوسپارى بەكىتىلەدى. وسى ناۋقان اياسىندا الدىن الۋ ءىس-شارالارى جانداندىرىلدى، كيىكتەر براكونەرلىگىنە، ولاردىڭ دەريۆاتتارىن جانە قازاقستان اۋماعىنداعى جابايى فاۋنانىڭ باسقا دا تۇرلەرىن وتكىزۋگە جانە ساتىپ الۋعا ماماندانعان ءبىرقاتار قىلمىستىق توپتاردىڭ جولى كەسىلدى. جىل باسىنان بەرى ينسپەكتورلار كيىك براكونەرلىگىنىڭ 56 فاكتىسىن انىقتادى، 4077 ءمۇيىز بەن 141 كيىكتىڭ ۇشاسىن تاركىلەدى»، - دەدى د. تۇرعامبايەۆ ورتالىق كوممۋنيكاتسيالار قىزمەتىندە وتكەن باسپا ءسوز ءماسليحاتىندا.
دەگەنمەن، سپيكەردىڭ ايتۋىنشا بارلىق قابىلدانىپ جاتقان شارالارعا، براكونەرلىك ءۇشىن قىلمىستىق جاۋاپكەرشىلىكتىڭ قاتاڭداۋىنا قاراماستان، براكونەرلىك فاكتىلەرى تىيىلماي وتىر.
«كيىكتەردى ساقتاۋ ماقساتىندا 2020-جىلى عىلىمي ماقساتتاردا پايدالانۋدان باسقا، كيىكتەردى، ولاردىڭ بولىكتەرى مەن دەريۆاتتارىن رەسپۋبليكانىڭ بۇكىل اۋماعىندا پايدالانۋعا تىيىم سالۋ ەنگىزىلدى. قازىرگى ۋاقىتتا ورال پوپۋلياتسياسىنىڭ كيىكتەرىن ساقتاۋ ماقساتىندا باتىس قازاقستان وبلىسىنىڭ قازتالوۆ، جانىبەك، بوكەي وردا جانە جاڭاقالا اۋداندارىنىڭ اۋماقتارىن قامتيتىن «بوكەيوردا» مەملەكەتتىك تابيعي رەزەرۆاتىن قۇرۋ ماسەلەسى پىسىقتالۋدا.
سونداي-اق، باتىس قازاقستان وبلىسىنىڭ جانىبەك جانە قازتالوۆ اۋداندارىنىڭ اۋماعىندا رەسپۋبليكالىق ماڭىزى بار اشىوزەك مەملەكەتتىك تابيعي قاۋمالىن قۇرۋ جوباسى ازىرلەندى»، - دەيدى د. تۇرعامبايەۆ.
سونىمەن بىرگە، جانۋارلار دۇنيەسىن قورعاۋ، ەسەپكە الۋ جانە مونيتورينگ تەتىكتەرىن، ونىڭ ىشىندە پيلوتسىز ۇشۋ اپپاراتتارىن قولدانا وتىرىپ، قايتا قاراۋ، GPS- ترەكەرلەردى پايدالانۋ، ينسپەكتورلاردى توسكە تاعاتىن بەينەوجەتوندارمەن جاراقتاندىرۋ جوسپارلانۋدا.
