16:28, 19 - ماۋسىم 2020 | GMT +6
56 جاستاعى ايەل كوروناۆيرۋس تۋرالى جالعان حابار تاراتقان - اقمولا وبلىسى
كوكشەتاۋ. قازاقپارات - اقمولا وبلىسىندا كوروناۆيرۋسپەن اۋىرعاندار تۋرالى جالعان حابار تاراتقان ەرەيمەنتاۋ اۋدانىنىڭ تۇرعىنى انىقتالدى، دەپ حابارلايدى قازاقپارات ءتىلشىسى وبلىستىق پ د باسپا ءسوز قىزمەتىنە سىلتەمە جاساپ.
ۆەدوموستۆونىڭ مالىمەتىنشە، ماۋسىمنىڭ 16 سىندا WhatsApp مەسسەندجەرىنە مونيتورينگ جۇرگىزۋ كەزىندە پوليتسيا ءبولىمىنىڭ ۋچاسكەلىك ينسپەكتورى اۋدان تۇرعىندارىنىڭ كوروناۆيرۋس ينفەكسياسىن جۇقتىرعاندىعى تۋرالى جالعان اقپارات تاراتۋ وقيعاسىن انىقتادى.
«جەدەل-ىزدەستىرۋ شاراسى كەزىندە ەرەيمەنتاۋ اۋدانىنداعى اۋىلداردىڭ ءبىرىنىڭ تۇرعىنى 56 جاستاعى ايەل انىقتالدى. ول اۋديوجازبا ارقىلى جالعان اقپاراتتى WhatsApp توبىنداعى ءوزىنىڭ تۋىستارىنا جىبەرگەن»، - دەيدى ۆەدومستۆودان.
قازىرگى كەزدە، وسىعان بايلانىستى ق ر ق ك 274-بابىنىڭ 2-بولىگى (جالعان اقپارات تاراتۋ) بويىنشا سوتقا دەيىنگى تەرگەۋ امالدارى جۇرگىزىلۋدە.