گونكونگتاعى قاقتىعىستاردان 56 ادام زارداپ شەكتى

استانا. قازاقپارات - گونكونگتا ۇكىمەتكە قارسى كوتەرىلىس كەزىندە 56 ادام زارداپ شەكتى. كوتەرىلگەن توپتىڭ نەگىزگى كۇشىن ستۋدەنتتەر قۇرادى، دەپ حابارلادى CNN.

گونكونگتىڭ ورتالىعىن جايلاعان كوتەرىلىسشىلەر پوليتسيانىڭ قورشاۋىندا قالۋدان قاۋىپتەنەدى. ولار بەتتەرىنە بەتپەردە، كوزدەرىنە قورعايتىن كوزىلدىرىك، ۇستەرىنە جاڭبىردان قورعايتىن جامىلعى كيىپ العان. كوتەرىلىسشىلەر قالانىڭ ورتالىق ىسكەرلىك اۋدانىنا اپاراتىن باستى ماگيسترالداعى لاگەردى قيراتتى.

ۇكىمەت ءبىتىستىرۋ شارالارىنىڭ اياسىندا كوتەرىلىس بولىپ جاتقان اۋدانداردان ارنايى جاساقتىڭ شىعارىلعانىن ءمالىم ەتتى. بيلىكتەگىلەر شەرۋشىلەردى تاراۋعا جانە كوشەلەردەگى قوزعالىستى اشۋعا شاقىردى. الايدا كومپارتيا بيلىگىنە قارسى كوتەرىلگەندەر تاراۋدان باس تارتقان.

شەرۋشىلەر دەموكراتيالىق سايلاۋدىڭ وتكىزىلۋىن تالاپ ەتىپ وتىر: ولار قىتاي بيلىگىنىڭ 2017-جىلى وتەتىن سايلاۋعا ۇمىتكەرلەردى وزدەرى تاڭدايتىنىنا نارازى. 28- قىركۇيەكتە پوليتسيا شەرۋدى تاياق، كوزدەن جاس اعىزاتىن گاز بەن اەروزولدەردى قولدانۋ ارقىلى باسپاق بولدى، ءبىراق شەرۋشىلەردى تاراتا المادى.

جاپپاي كوتەرىلىستى «وككۋپاي سەنترال» توبى باستاعان. ونىڭ كوشباسشىلارىنىڭ اينالاسىنا مىڭداعان كوتەرىلىسشىلەر جينالدى.

الەۋمەتتىك جەلىلەردە اتالمىش جاپپاي قارسىلىق قوزعالىسىن «قولشاتىرلار توڭكەرىسى» دەپ اتاۋدا، سەبەبى 30 گرادۋس ىستىقتان قورعانۋ ءۇشىن كوپتەگەن قاتىسۋشىلار قولدارىنا قولشاتىر ۇستاپ العان، ونى پوليتسيا شاشاتىن اەروزولدەن قورعانۋ ءۇشىن ۇستاپ العاندار دا بار.