بيىل «بۋراباي» ۇلتتىق پاركىندە 550 مىڭنان استام كوشەت وتىرعىزىلادى

نۇر-سۇلتان. قازاقپارات - بيىل «بۋراباي» ۇلتتىق پاركى اۋماعىندا جارتى ميلليوننان استام كوشەت وتىرعىزىلادى.

بۇل تۋرالى ق ر پرەزيدەنتىنىڭ ءىس باسقارۋشىسى ايبەك دادەبايەۆ Telegram-داعى جەكە كانالىندا جازدى، دەپ حابارلايدى قازاقپارات.

«بۋراباي» ۇلتتىق پاركى اۋماعىندا ورمان وتىرعىزۋ باستالدى. جاس قاراعايلار مەن قايىڭدار پاركتىڭ سولتۇستىك بولىگىندە سالىنىپ جاتقان Aqbura كۋرورتىنىڭ تەرريتورياسىندا وتىرعىزىلادى. بيىلدىڭ وزىندە 65 گەكتار جەرگە 550 مىڭنان استام اعاش وتىرعىزۋ جوسپارلانعان»، - دەدى ا. دادەبايەۆ.

ءمالىم ەتىلگەندەي، ەكىجىلدىق تىكپە كوشەت «بۋراباي» مەملەكەتتىك ۇلتتىق تابيعي پاركىنىڭ پيتومنيگىندە ءوسىرىلدى.

«عالىمدارىنىڭ ايتۋىنشا، بۇل ايماقتاعى ورمانداردىڭ %65 قاراعاي، %35 جاپىراقتى اعاشتار قۇرايتىندىقتان، تاڭداۋ ءدال وسى تۇرلەرگە تۇسكەن. اعاش وتىرعىزىپ، ورمان القاپتارىن ۇلعايتۋعا كەز كەلگەن ادام ءوز ۇلەسىن قوسا الادى. ول ءۇشىن «بۋراباي» مەملەكەتتىك ۇلتتىق تابيعي پاركىنىڭ كەڭسەسىنە قوڭىراۋ شالىپ (تەل. 87163671897)، كوشەت وتىرعىزۋعا جازىلۋ قاجەت. بۇل اكسيا تەگىن، تەك بوس ۋاقىتىڭىز بەن نيەتىڭىز بولسا بولعانى. ورمان ەل داۋلەتى، جەر ساۋلەتى!»، - دەپ جازدى ا. دادەبايەۆ.