ەلوردادا تاكسيست ماس جولاۋشىنىڭ 550 مىڭ تەڭگەلىك التىن ساعاتىن ۇرلاعان

نۇر- سۇلتان قالاسى پوليتسيا دەپارتامەنتىنىڭ باسپا ءسوز قىزمەتىنىڭ مالىمەتىنشە، ۇيىنە قوناقتان ماس كۇيدە ورالعان ەلوردا تۇرعىنى قولىنداعى 550 مىڭ تەڭگەلىك «ياشما» ماركالى التىن ساعاتى جوق ەكەنىن بايقاعان.

«قوناقتان تۇندەلەتىپ شىققان ول «Toyota Camry» كولىگىن توقتاتىپ، تاكسي رەتىندە پايدالانعانى بەلگىلى بولدى. ارتقى ورىندىقتا وتىرعان جولاۋشى كوپ وتپەي ۇيىقتاپ كەتكەن. دىتتەگەن مەكەنجايعا جەتكەندە كولىك تىزگىنشىسى جولاۋشىنى وياتۋ كەزدە، قولىنداعى التىن ساعاتىن شەشىپ العان. ساعاتىن ۇيگە كەلگەننەن كەيىن عانا جوقتاعان ەر ادام بىردەن پوليتسياعا جۇگىندى»، - دەپ جازادى دەپارتامەنتتىڭ باسپا ءسوز قىزمەتى.

جەدەل- ىزدەستىرۋ كەزىندە پوليتسيا قىزمەتكەرلەرى 40 جاستاعى كۇدىكتىنى ۇستاعان.

«جەكە تاسىمالداۋمەن اينالىساتىن ەر ادام كىناسىن مويىندادى. زاتتاي ايعاق تاركىلەنىپ، ونىڭ ەلوردا اۋماعىندا بۇرىن جاسالعان ۇقساس قىلمىستارعا قاتىستىلىعى تەكسەرىلىپ جاتىر. نۇر- سۇلتان قالاسىنىڭ پوليتسيا دەپارتامەنتى تۇرعىنداردى قىراعى بولۋعا، قۇندى زاتتاردى قاراۋسىز قالدىرماۋعا جانە بەيتانىس ادامدارعا سەنبەۋگە كەڭەس بەرەدى»، - دەلىنگەن پوليتسيا دەپارتامەنتىنىڭ حابارلاماسىندا.

اۆتور: ەسىمجان ناقتىباي