تارازدا قازاق حاندىعىنىڭ 550 جىلدىعىنا ارنالعان شارالار جالعاسىپ جاتىر - فوتو
ءۇشىنشى كۇن قاتارىنان تۇڭعىش پرەزيدەنت ساياباعىنىڭ قوناقتارى كوشپەندىلەر وركەنيەتىنىڭ تاريحىمەن تانىسىپ جاتىر. مۇندا دالا بيلەۋشىلەرىنىڭ شاتىرلارى مەن كيىز ۇيلەر، قول كۇرەسى، كونە سەمسەرلەرمەن كۇش سىناسۋ، قول ونەر بۇيىمدارىنىڭ، كونە الاشالاردىڭ، قارۋ، زەرگەرلىك بۇيىمداردىڭ كورمەسى قانات جايدى. «قازاق الەمى» تاريحي- ەتنوگرافيالىق كەشەنىنىڭ ەكسپوزيتسياسى قازاقستان اۋماعىندا مىڭداعان جىلدار بويى قالىپتاسقان دالا بيلەۋشىلەرى مەن كوشپەندىلەرى ءومىرى جايىندا سىر شەرتەدى.
مۇندا ويىن- ساۋىق جانە تانىمدىق ماڭىزى زور اتتراكسيونداردى دا كورۋگە بولادى. ساياباقتا شاتىرلار، كيىزدەن جاسالعان «التىن ساقا» بالالار الاڭى، «كوك كۇيمە» كيىز ۇيلەرى، «دۋلىعا» ينستاللياتسياسى، «سكيفتەر- ساقتار الەمى» رەلەفتىك پاننوسى، «اق شاتىر» ورتالىق ساحناسى، «وت كۇشى» اللەياسى، «سويلەيتىن تاستار» لابيرينت- ينستاللياتسياسى، «جەل داۋىسى» ينستاللياتسياسى، «تاريح دوڭعالاعى» مەتافورا- ساحناسى، قولونەر شەبەرلەرىنىڭ جارمەڭكەسى، اڭشىلاردىڭ، قولونەرشىلەردىڭ، وتىنشىلاردىڭ، زەرگەرلەردىڭ، ەرشىلەردىڭ، تىگىنشىلەردىڭ تاقىرىپتىق اۋىلدارى ورىن تەپكەن. «جادىگەر» جىلجىمالى مۇراجاي ەكسپوزيتسياسى جۇمىس ىستەيدى.
ق ر تۇڭعىش پرەزيدەنت ساياباعىندا «اق شاتىر» الاڭىندا سۇيىكتى حالىق اندەرى مەن كۇيلەر ورىندالىپ جاتىر، مەملەكەتتىك سيمفونيالىق وركەستر مەن فولكلورلىق- ەتنوگرافيالىق انسامبل مۋزىكانتتارى ونەر كورسەتۋدە. ۇلتتىق اۋەندى سۇيەتىندەر ءۇشىن «عاسىرلار سازى» جانە «تۇران» فولكلورلىق- ەتنوگرافيالىق انسامبلدەرى ونەر كورسەتتى. قالا تۇرعىندارى مەن قوناقتارى قازاقتىڭ مۋزىكالىق اسپاپتارى تۋرالى «اسپاپتار شەرۋى» جانە «توعىز پەرنە» قازاق كۇيلەرى تۋرالى باعدارلامالاردى تاماشالادى.
قازاق حاندىعىنىڭ 550 جىلدىعىن تويلاۋعا ارنالعان شارالاردىڭ ىشىندە قوناقتارعا «ماڭگىلىك ەل» حالىقارالىق اقىندار ايتىسى ۇسىنىلدى. وندا 26 سۋىرىپ سالما شەبەرىنىڭ ۇزدىگى انىقتالدى. سونىمەن قاتار «ەۋرازيا بارىسى» ءۇشىنشى حالىقارالىق تۋرنيرى ءوتتى.
بۇگىن تارازدا قازاق حاندىعىنىڭ 550 جىلدىعىن تويلاۋعا ارنالعان شارالار اياقتالادى. كەشكە تۇڭعىش پرەزيدەنت ساياباعىندا «تارازدىڭ نۇرلى ءتۇنى» گالا- كونسەرتى وتەدى.
