قازاق حاندىعىنىڭ 550 جىلدىعى: تارازدا تەاترلاندىرىلعان قويىلىمدى ازىرلەۋ جۇمىستارىنا اسانالى ءاشىموۆ جەتەكشىلىك ەتەدى

تاراز. قازاقپارات - 9- قازان كۇنى تاراز قالاسىنىڭ ورتالىق ستاديونىندا م. اۋەزوۆ اتىنداعى الماتى دراما تەاترىنىڭ تەاترلاندىرىلعان قويىلىمىنا شامامەن بەس ءجۇز ادام قاتىسادى، دەپ حابارلادى جامبىل وبلىسى اكىمىنىڭ باسپا ءسوز قىزمەتىنەن.

يدەيانىڭ اۆتورى - جازۋشى، ق ر پارلامەنت سەناتىنىڭ دەپۋتاتى جابال ەرعاليەۆ. سيۋجەتتىك جەلى ونىڭ «قيلى جول» («درۋگوي پۋت») شىعارماسىنا نەگىزدەلگەن. جوباعا ك س ر و حالىق ءارتىسى، مەملەكەتتىك سىيلىقتىڭ لاۋرەاتى اسانالى ءاشىموۆ جەتەكشىلىك ەتىپ وتىر.

كەڭەسشى رەتىندە قازاقستاننىڭ حالىق ءارتىسى ەسمۇحان وبايەۆ شىقتى. قويىلىممەن سونداي-اق قازاقستاننىڭ ەڭبەك سىڭىرگەن قايراتكەرلەرى اۋباكىر راحىموۆ، الما كاكىشيەۆا، ەلىك نۇرسۇلتان، مۇحتار قاپالبايەۆ باستاعان رەجيسسەرلىك توپ جۇمىس ىستەۋدە.

قويىلىمدا م. اۋەزوۆ اتىنداعى تەاتردىڭ، جامبىل وبلىسىنىڭ قازاق جانە ورىس دراما تەاترلارىنىڭ ۇجىمدارى، ق ر قورعانىس مينيسترلىگىنىڭ «وڭتۇستىك» ايماقتىق باسشىلىعىنىڭ اسكەري قىزمەتكەرلەرى، ج و و ستۋدەنتتەرى مەن مەكتەپ وقۋشىلارى جۇمىلدىرىلعان.

دەكوراتسيالار مەن 200 اسكەري جانە 150 بيشىگە ارنالعان كوستيۋمدەر دايىندالدى.

ەسكە سالا كەتەيىك، بيىل قازاق حاندىعىنىڭ 550 جىلدىعىن مەرەكەلەۋ ەلىمىزدىڭ بارلىق ايماقتارىندا ءوتىپ جاتىر. 550 جىل بۇرىن تالاس پەن شۋ وزەندەرىنىڭ اراسىنداعى جايساڭ شاتقالىندا كەرەي مەن جانىبەك سۇلتاندار قازاق حاندىعىنىڭ نەگىزىن قۇرعان جامبىل وبلىسىندا 7,8,9- قازان كۇندەرى ايتۋلى شارالار وتەدى.