قازاق حاندىعىنىڭ 550 جىلدىعىنا وراي اقتوبەدە وتكەن ايتىس مارەسىنە جەتتى
دەپ حابارلايدى «نۇر وتان» پارتياسىنىڭ باسپا ءسوز قىزمەتىنەن.
شارانىڭ ماقساتى - ايتىس ونەرىن مادەنيەتىمىزدىڭ باعا جەتپەس اسىل مۇراسى رەتىندە حالىققا جان- جاقتى ناسيحاتتاۋ، ەلدەگى حالىقتار دوستىعىن، بەرەكە- بىرلىكتى جانە ساياسي تۇراقتىلىقتى، ايماقتاعى اۋقىمدى جۇمىستاردى جىرعا قوسۋ.
اقىندار ايتىسىنا ەلىمىزدىڭ وڭىرلەرىنەن قاتىسقان 18 اقىن ونەرسۇيەر قاۋىمدى ورەلى وي، تەرەڭ تولعامدارىمەن ءتانتى ەتىپ، رۋحتى جىرىمەن سۋسىنداتتى، ەلدىكتى، تاۋەلسىزدىكتى جىرلادى.
ايتىستى قازاقستان رەسپۋبليكاسىنىڭ ەڭبەك سىڭىرگەن قايراتكەرى، م. ماقاتايەۆ اتىنداعى سىيلىقتىڭ ەكى مارتە لاۋرەاتى، اقىن، جۋرناليست ءجۇرسىن ەرمان جۇرگىزدى.
اقىندارعا قازاق ونەرى مەن ادەبيەتىندە، تاريحىندا وزىندىك ورنى بار ەلگە بەلگىلى ازاماتتار - «قازاقفيلم» كينوستۋدياسىنىڭ جانە م. اۋەزوۆ اتىنداعى قازاق مەملەكەتتىك اكادەميالىق دراما تەاترىنىڭ اكتەرى، رەجيسسەر، قازاقستاننىڭ حالىق ءارتىسى، ك س ر و حالىق ءارتىسى اسانالى ءاشىموۆ، قازاقستاننىڭ حالىق ءارتىسى التىنبەك قورازبايەۆ، قازاقستان جازۋشىلار وداعىنىڭ مۇقاعالي ماقاتايەۆ جانە حالىقارالىق جامبىل اتىنداعى سىيلىقتارىنىڭ لاۋرەاتى، مەملەكەتتىك سىيلىقتىڭ لاۋرەاتى نەسىپبەك ايتوۆ باعا بەردى.
قازىلار القاسىنىڭ شەشىمى بويىنشا بەلگىلى ايتىسكەر اقىن اسەم ەرەجە قىزى باس جۇلدەگە لايىق دەپ تانىلىپ، 1200000 تەڭگە سىياقىعا يە بولدى. اقتوبەنىڭ جاس جۇيرىگى جانىبەك بەيبىتوۆ ءبىرىنشى جۇلدەگە (1 ميلليون تەڭگە) لايىق دەپ تابىلدى. استانا قالاسىنان قاتىسىپ، ادەمى ازىلىمەن، تەرەڭ ويلارىمەن حالىق سۇيىسپەنشىلىگىنە بولەنگەن اقىن اينۇر تۇرسىنبايەۆا ەكىنشى (700 مىڭ تەڭگە)، اقتوبەلىك اقىن ەرشات قايبولدين ءۇشىنشى ورىندى (500 مىڭ تەڭگە) يەلەندى.
قاتىسقان بارلىق اقىندارعا 100 مىڭ تەڭگەدەن ىنتالاندىرۋ سىيلىقتارى تابىس ەتىلدى. وبلىس اكىمى بەردىبەك ساپاربايەۆ بارلىق اقىندارعا جانە ونەرىمەن ەرەكشەلەنگەن اينۇر تۇرسىنبايەۆا، رينات زايتوۆقا، اسەم ەرەجە قىزىنا قوسىمشا سىي- سياپات كورسەتتى. سونىمەن قاتار بىرلىك پەن تاتۋلىقتى كوبىرەك جىرعا قوسقان 4 اقىن (مارات احمەتوۆ، شالقارباي ءىزباساروۆ، ايتبەك تۇرسىنبايەۆ، ارۋنا كەرىمبەك) قازاقستان حالقى اسسامبلەياسىنىڭ سىيلىعىن يەلەندى.
ايتا كەتەيىك، «نۇر وتان» پارتياسى بۇگىندە اقىندار ايتىسىن تىكەلەي قولداپ كەلەدى. سونىمەن قاتار، ۇلتتىق ونەر مەن مادەنيەتتى دامىتۋعا باعىتتالعان كوپتەگەن جوبالارعا قامقورلىق كورسەتۋدە.
